Në një mbrëmje plot emocione në emisionin “Për Shqiptarët”, dhimbja u kthye në dritë dhe shpresa mori formë.
E gjitha kjo erdhi falë ndihmës së mijëra shqiptarëve zemërgjerë, tre fëmijët e Kreshnik Tomanit – babait që humbi jetën tragjikisht në kulmin e rinisë – morën një dhuratë që do t’ua ndryshojë jetën përgjithmonë: një shtëpi të re.
Dy vajzat dhe djali i vogël, të veshur me bluza që mbanin portretin e të atit, përqafuan nënën mes lotëve të gëzimit, duke prekur thellë publikun dhe ndjekësit e programit.
Në atë moment simbolik, Elvis Naçi – themelues i Fondacionit Firdeus – shtypi butonin që shpalli dhurimin e shtëpisë, duke thënë vetëm një fjali: “Ta gëzoni shtëpinë tuaj të re!”.
Por surprizat nuk përfunduan këtu. Këngëtarja e dashur Aurela Gaçe u shfaq në skenë për t’i bërë një dhuratë të veçantë Nikitës, vajzës 10-vjeçare të Kreshnikut. Ajo i dhuroi një bursë të plotë për mësime pianoje, duke i hapur rrugën ëndrrës së saj për t’u bërë këngëtare – një ëndërr që i ati e kishte mbështetur gjithmonë me dashuri dhe sakrificë.
Një tjetër moment prekës erdhi kur në studio hyri Kejsi, një vajzë jetime në moshën e Nikitës. Ajo mbante në duar dy papagallë, dhuratën që Kreshniku i kishte premtuar të bijës por nuk arriti kurrë t’ia blinte. Ishte një gjest i thjeshtë, por me peshë të madhe shpirtërore, që çoi në vend një premtim të pathënë.
Kjo natë do të kujtohet si një shembull i fuqisë së solidaritetit shqiptar. Një natë ku amaneti i një babai u bë realitet dhe ku fëmijët e tij tashmë kanë një strehë të sigurt. /Prive By Liberta Spahiu
