Këngëtarja e njohur Beatrix Ramosaj, së bashku me vëllain e saj, kantautorin Alban Ramosaj, kanë ndarë një lajm tejet emocionues me ndjekësit e tyre. Pas disa muajsh tepër të vështirë dhe sfidues, nëna e tyre, Antigone Ramosaj, ka përfunduar me sukses ciklin e kimioterapisë dhe terapisë me rrezatim.
Përmes një postimi të përbashkët në llogaritë e tyre në Instagram, dyshja ka publikuar një moment mjaft prekës ku shihen duke i dhënë një përqafim të ngrohtë nënës së tyre, në një ambient të dekoruar me tullumbace rozë, si simbol i kësaj fitoreje të rëndësishme.
Mbi pamjet ku shkruhej “Kanë qenë disa muaj të vështirë…”, Beatrix ka bashkangjitur një mesazh të gjatë e ndjerë, ku thekson rëndësinë e familjes dhe optimizmit në ditë të tilla.
“Përqafimi për të cilin u lutëm. Ka qenë një rrugëtim i ashpër, i vështirë për t’u shprehur me fjalë, por mirënjohja dhe optimizmi mbizotërojnë. Ndonëse kjo sfidë e vështirë është drejt fundit, ne kujtohemi se jeta është e shkurtër dhe të jetosh… të mbash pranë të dashurit tuaj në çdo moment është një dhuratë dhe privilegj,” – shkruan Beatrix në postim.
Ajo njoftoi se tashmë nëna e tyre e ka përfunduar zyrtarisht trajtimin dhe se kjo është një ditë feste për familjen. Hapi i radhës për Antigonën do të jetë në mes të muajit mars, ku do t’i nënshtrohet skanimit të parë monitorues pas terapive. Familja Ramosaj shprehet plot shpresë se ky kontroll do të konfirmojë shërimin e plotë nga kjo sfidë e rëndë.
Në mbyllje të mesazhit, Beatrix dhe Albani nuk harruan të falënderonin të gjithë njerëzit që u qëndruan pranë gjatë kësaj periudhe, duke dërguar gjithashtu një mesazh solidariteti për çdo familje që po përballet me të njëjtën luftë kundër kancerit. /Prive By Liberta Spahiu
View this post on Instagram
