Ishte janari i vitit 2021 kur shefi i njohur bëri postimin e tij të fundit në rrjetet sociale, duke u zhdukur plotësisht nga radari mediatik. Plot pesë vite heshtje totale lanë vend për spekulime nga më të ndryshmet, ndërsa fansat pyesnin çdo ditë nëse do ta shihnin sërish në ekranet tona. Edhe pse vitin e kaluar qarkulloi një foto e tij që ngriti dyshime, asgjë nuk ishte zyrtare deri në këtë moment.
E vërteta është se Renato nuk ka ndenjur duarkryq, por ka bërë hapin më gjigant të karrierës së tij në rrafshin ndërkombëtar, përtej oqeanit. Ai tashmë është vendosur në Miami të Floridës, ku ka marrë rolin prestigjioz të Shefit Ekzekutiv në një nga hotelet më luksoze në botë, “The Ritz-Carlton”.
Suksesi i tij ka thyer kufijtë, duke bërë që edhe gjiganti mediatik “Forbes” dhe “Miami New Times” të shkruajnë me superlativa për të. Renato po udhëheq restorantin “Paralía”, një hapësirë e frymëzuar nga brigjet e Egjeut, e cila është pjesë e një transformimi marramendës prej 100 milionë dollarësh të resortit në Key Biscayne.
Nga studioja e “Hell’s Kitchen” në Tiranë, Mekolli tani po servir shije të rafinuara greke dhe turke për elitën amerikane, duke dëshmuar se kjo pauzë e gjatë ishte në fakt një përgatitje për të pushtuar majat e gastronomisë botërore. /Prive By Liberta Spahiu
