Selena Gomez dhe producenti i njohur muzikor Benny Blanco kanë thënë “po” në një ceremoni intime në një pronë private në Santa Barbara, Kaliforni, më 27 shtator.
Të dy u kujdesën që dita e tyre e madhe të ishte plot elegancë. Nusja zgjodhi një fustan të personalizuar nga Ralph Lauren, në ngjyrë fildishi, me model halterneck, fund të gjatë dhe të plotë, të zbukuruar me dantellë dhe detaje drapeshimi.
Pjesa e pasme e hapur i shtoi finesë, ndërsa diamantet e Tiffany & Co shkëlqyen poshtë flokëve të saj të shkurtër e të valëzuar, që përputheshin në mënyrë perfekte me stilin e qafës së lartë të fustanit. Shkëlqimi i saj u plotësua nga produktet e markës së saj të famshme të bukurisë, Rare Beauty.
Duke ndjekur elegancën e zgjedhjeve të nuses, Blanco veshi një smoking klasik të zi me papion.
Pas ceremonisë, çifti ndau lajmin e bukur me fansat përmes disa fotografive të realizuara nga Petra Collins, të cilat u publikuan në Instagram. Në pamjet e publikuara, Gomez shihet duke mbajtur buqetën e saj me zambakë të luginës, zbathur dhe duke buzëqeshur e lumtur, ndërsa qëndron në kopshtin e gjelbër të pronës.
Në foto të tjera, çifti shihet duke u përqafuar, duke ecur dorë për dore dhe duke shpërfaqur lumturinë e sapomartuarve. /Prive By Liberta Spahiu
View this post on Instagram
