Raportet mes artisteve tona shpesh mbeten një kuriozitet për publikun, por ndonjëherë një intervistë e vetme mjafton për të hedhur dritë mbi faktin pse disa bashkëpunime aq të pritura nuk ndodhin kurrë. Fifi ishte e ftuar sonte në një intervistë përballë Meriton Mjekiqit, ku nuk i shpëtoi pyetjeve të drejtpërdrejta rreth mungesës së një projekti muzikor me Dhurata Dorën, nisur nga fakti që vajzat dikur ishin pjesë e të njëjtit label menaxhimi.
Duke lënë mënjanë aludimet e mundshme, këngëtarja sqaroi se nuk ka asnjë arsye të fshehtë apo inat profesional pas kësaj mungese në diskografinë e tyre. Ajo tregoi se në atë periudhë ishte ende në hapat e parë të karrierës, ndërsa Dhurata ishte tashmë një emër shumë i konsoliduar në industrinë tonë muzikore.
Për ta bërë edhe më të qartë situatën, Fifi u shpreh se nuk kanë një këngë bashkë thjesht sepse nuk ia ka kërkuar kurrë një gjë të tillë koleges së saj. Përtej kësaj, artistja vuri theksin tek fakti që të dyja i përkasin zhanreve krejtësisht të ndryshme muzikore, çka e bën mjaft të logjikshme pse rrugët e tyre nuk janë kryqëzuar ende në një duet.
Biseda mori një tjetër rrjedhë kur Meritoni me stilin e tij insistues kërkoi të dinte drejtpërdrejt nga Fifi se cila prej të dyjave këndon më mirë live. Në vend që të jepte një përgjigje që mund të ngjallte debate, ajo zgjodhi rrugën e diplomacisë dhe maturisë. Fifi e vlerësoi kolegen e saj duke theksuar se Dhurata është një artiste shumë e mirë që performon shkëlqyeshëm live, por refuzoi kategorikisht të bënte krahasime mes vokaleve të tyre. Për të shmangur çdo lloj keqkuptimi, ajo citoi se nuk është kritike arti për të gjykuar, duke ia lënë publikut atë detyrë dhe duke treguar respekt maksimal për hapësirën e secilës në skenë. /Prive By Liberta Spahiu
