Është gjerësisht e pranuar që identiteti është një spektër, dhe po ashtu disa besojnë se edhe seksualiteti nuk është thjesht “i zi” apo “i bardhë” siç e paraqet heteronormativiteti tradicional.
Miliona njerëz në mbarë botën po e refuzojnë konceptin e ndarjes gjinore binare, duke u identifikuar si jo-binarë ose genderfluid, brenda ombrellës LGBTQ+, krahas një liste të gjatë identitetesh të tjera alternative.
Megjithatë, një “i ri” në këtë fushë po fiton gjithnjë e më shumë njohje – dhe disa njerëz thonë se ai përputhet me mënyrën se si ndihen – quhet gris-seksualitet ose gray-A.
Ky orientim seksual lidhet me spektrin aseksual, ku njerëzit zakonisht nuk ndjejnë tërheqje seksuale ndaj të tjerëve ose mund të mos kenë fare një orientim seksual. Por personat gray-ace nuk e gjejnë veten plotësisht në këtë përkufizim. Ata mund të ndodhen diku në mes të mos pasjes fare të ndjenjave seksuale dhe tërheqjes seksuale “konvencionale”. Siç e tregon edhe emri, ky seksualitet është disi i vështirë për t’u përcaktuar, duke përbërë një “zonë gri” seksuale.
Megjithatë, WebMD e ka ndarë atë në tre tipe: sex-repulsed (të neveritur nga seksi), sex-neutral (neutral ndaj seksit) dhe sex-positive (me qasje pozitive ndaj seksit).
Kjo do të thotë se një person gray-ace mund të ndihet i neveritur ose i painteresuar ndaj seksit, ose, në anën tjetër, të mos ndihet i neveritur por as të mos e kërkojë në mënyrë aktive. Personat e tillë mund të pranojnë të kenë marrëdhënie seksuale nëse janë në një lidhje ose për kënaqësi, nëse janë neutralë ose pozitivë ndaj seksit.
Karakteristika të tjera të zakonshme përfshijnë: mosprioritizimin e tërheqjes seksuale në partnerët romantikë, mosshikimin e seksit si diçka të rëndësishme dhe/ose shfaqjen e dashurisë në mënyra të tjera jo-seksuale.
Terapeutja e licencuar e marrëdhënieve dhe familjes, Shadeen Francis, i tha Men’s Health se një person graysexual mund të ndihet, për shembull:
“Mendoj se e përjetoj tërheqjen ndonjëherë, por vetëm në rrethana të caktuara.”
Ose: “Ndoshta më pëlqejnë disa lloje aktivitetesh, por më neveritin ose më largojnë të tjerat.”
“Ai që identifikohet si graysexual shpesh është një person që thotë: ‘Identiteti im – orientimi im seksual – ekziston në zonën gri’,” shtoi Francis. “Gris-seksualiteti është pjesë e ombrellës më të gjerë aseksuale ose ace.”
Ekspertët theksojnë se kjo nuk ka lidhje me njerëzit që kanë dëshirë të ulët seksuale për shkak të ndryshimeve në marrëdhënie ose faktorëve të tjerë si medikamentet apo sëmundjet. Përkundrazi, disa persona graysexual mund të kenë dëshirë të lartë seksuale në rrethana të caktuara.
Francis shtoi gjithashtu se disa persona nën ombrellën gray-A mund të ndajnë ngjashmëri me demiseksualitetin, ku tërheqja ndodh vetëm pasi krijohet një lidhje e fortë emocionale me një person të caktuar. Demisexuality Resource Centershton: “Disa demiseksualë lidhen edhe me përkufizimet e tjera të gris-seksualitetit, si p.sh. ta gjejnë të paqartë ose të vështirë për t’u përcaktuar përvojën e tërheqjes seksuale… Është e mundur dhe e vlefshme të përdoren të dyja etiketat nëse të dyja përputhen.” /Prive By Liberta Spahiu
