Scarlett Selby futi një kub NeeDoh në ngrirje dhe më pas e vendosi në mikrovalë për disa sekonda për ta bërë më të butë, pasi thuhet se kishte parë një video të njerëzve që e bënin këtë në rrjetin social TikTok.
Por loja e padëmshme shpejt u kthye në një makth të vërtetë kur lodra shpërtheu, duke i hedhur në fytyrë dhe në kraharor 7-vjeçares një masë të nxehtë dhe ngjitëse nga brendësia e kubit.
Babai i tmerruar i Scarlett, Josh Selby, vrapoi drejt saj kur dëgjoi një “ulërimë rrëqethëse” dhe përpiqej dëshpërimisht t’i hiqte substancën ngjitëse nga lëkura dhe rrobat e vajzës gjatë incidentit tronditës në tetor 2024.
Ai e çoi menjëherë Scarlett në spital, ku mjekët e futën në koma të induktuar nga frika se djegiet në gojë do t’i shkaktonin enjtje të rrugëve të frymëmarrjes dhe do t’i mbyllnin ato.
Nëna e saj, Amanda Blakenship, tha se vajza kishte parë video ku njerëzit vendosnin lodrën në mikrovalë në llogaritë e TikTok-ut dhe YouTube-it të të tjerëve dhe donte ta provonte vetë.
Megjithatë, kompania që prodhon lodrën, Schylling Toys, ka një paralajmërim në faqen e tyre të internetit që thotë: “Mos e ngrohni, ngrini apo futni në mikrovalë – mund të shkaktojë lëndime personale.”
Duke kujtuar ngjarjen shkatërruese të vitit të kaluar, babai i Scarlett, Josh, nga Festus, Missouri (SHBA), tha:
“Ajo e kishte ngrirë kubin NeeDoh një natë më parë dhe të nesërmen më tregoi që ishte bërë si gur dhe po luante me të.
E futi në mikrovalë. Po e shikoja dhe e pashë që e preku për të parë nëse ishte shumë i nxehtë kur e nxori.”
Josh vazhdoi:
“Gjithçka ndodhi shumë shpejt. Dëgjova të ulërinte, ishte një ulërimë e tmerrshme. Kishte shpërthyer gjithandej në gjoks, gojë dhe mjekër. E çova sa më shpejt që munda në spital. Unë isha i shkatërruar. Ajo kaloi një javë në spital dhe për tre ditë ishte në koma. Nuk mendoj se mund të flisja me askënd pa shpërthyer në lot.”
Nëna e saj shtoi se vajza “vazhdoi të ulërinte nga dhimbjet” edhe pas 30 minutash rrugë për në Spitalin e Fëmijëve në St. Louis, para se të vendosej në koma të induktuar.
Dëmtimet që ka pësuar Scarlett mund të kërkojnë transplant lëkure në të ardhmen, tha Amanda me shqetësim.
Duke iu përgjigjur kësaj dukurie në rrjet, TikTok tha se nuk lejon përmbajtje që promovon sjellje të rrezikshme.
Kompania shtoi se ka krijuar teknologji që e ndihmon të zbulojë dhe të ndërhyjë kur ka rritje të menjëhershme të përmbajtjeve të dëmshme që lidhen me etiketa të caktuara.
Ndërkohë, YouTube deklaroi se është një platformë për 13+ dhe se llogaritë e personave nën 13 vjeç pa mbikëqyrje prindërore do të mbyllen ose do të kthehen në llogari të mbikëqyrura.
YouTube shtoi gjithashtu se ka rregulla të rrepta që ndalojnë përmbajtjen ku fëmijët kryejnë veprime të rrezikshme, duke përfshirë sfida që paraqesin rrezik të menjëhershëm për dëmtim fizik, dhe se siguria e përdoruesve është “prioritet maksimal”, ndaj “hiqet me forcë” ky lloj përmbajtjeje.
Kompania Schylling ka lëshuar më parë një deklaratë për LADbible Group për këtë çështje:
“Sigurimi i sigurisë së konsumatorëve tanë është themelor për Schylling. U zhgënjyem kur pamë se ishte krijuar një trend në rrjetet sociale që tregonte keqpërdorim të produktit tonë NeeDoh.
Përdorimi i gabuar i një produkti NeeDoh duke e futur në mikrovalë, duke e ngrohur apo ngrirë, është i rrezikshëm dhe mund të shkaktojë lëndime.
Schylling ka bashkëpunuar me kompani të rrjeteve sociale, si TikTok, për të hequr përmbajtjen me ndikim që tregon keqpërdorimin e produktit NeeDoh.
Gjithashtu, Schylling ka shtuar një paralajmërim në paketimin e produktit NeeDoh dhe në faqen tonë të internetit për të ndihmuar në parandalimin e keqpërdorimit të produktit.
Schylling e ka informuar Komisionin për Sigurinë e Produkteve të Konsumatorëve dhe do të vazhdojë të bashkëpunojë me ta.”
/Prive By Liberta Spahiu
