Po vazhdon procesi gjyqësor në Gjykatën Themelore të Prishtinës për njërën nga ngjarjet që tronditi opinionin publik, vrasjen e Liridona Ademajt. Në seancën e fundit, vëmendja u përqendrua mbi provat materiale dhe komunikimet e fundit të të dyshuarit kryesor, Naim Murseli.
Mesazhi “kod” një natë para ngjarjes
Gjatë ballafaqimit me provat, Gjykata bëri të ditur një komunikim mes Naim Murselit dhe Granit Plavës. Sipas dosjes, më 28 nëntor 2023, vetëm një ditë para se të ndodhte ngjarja tragjike, Murseli i kishte shkruar Plavës:
“Shok, me siguri nesër përfundon.”
I pyetur për këtë mesazh nga gjyqtarja e rastit, Murseli ka zgjedhur një linjë mbrojtëse duke deklaruar se “nuk i kujtohet”ta ketë dërguar një tekst të tillë, shkruan Reporteri.net.
Kërkesat e Naim Murselit: Kontakt me fëmijët dhe Behgjet Pacollin
Përveç detajeve të hetimit, në seancë u bënë publike edhe dy kërkesa specifike të bëra nga i pandehuri:
Kontakti me fëmijët: Murseli ka kërkuar të lejohet të komunikojë me fëmijët. Lidhur me këtë, gjyqtarja njoftoi se janë në pritje të një përgjigjeje nga autoritetet suedeze (pasi fëmijët janë shtetas suedezë).
Kontakti me Behgjet Pacollin: Kërkesa e dytë e Murselit ishte për të pasur kontakt me ish-presidentin Behgjet Pacolli, me të cilin kishte punuar më parë. Megjithatë, kjo kërkesë u refuzua menjëherë nga Gjykata. /Prive By Liberta Spahiu
