ChatGPT tashmë është bërë pjesë e përditshmërisë sonë – njerëzit e përdorin për të krijuar profile takimesh, për të kopjuar në ese dhe për të risjellë CV-të e tyre në formë më të mirë. Por, a ka shkuar kjo gjë shumë larg?
Që nga momenti që OpenAI lëshoi chatbot-in e tij, shumë njerëz kanë qenë skeptikë për kapacitetet reale të këtij mjeti dhe çfarë do të thotë kjo për të ardhmen tonë. Dhe, megjithëse është i dobishëm për të të ndihmuar se si të përgjigjesh një emaili pasiv-agresiv nga puna, shkencëtarët kanë arritur së fundmi në disa përfundime shqetësuese rreth ndikimit të tij tek truri ynë.
Një studim i ri nga Laboratori i Medias në MIT ka zbuluar disa të dhëna alarmuese për ndikimin që mund të ketë përdorimi i AI.
Në këtë studim, 54 persona të moshës 18 deri 39 vjeç në Boston u ndanë në tre grupe dhe u kërkua të shkruanin disa ese në stilin e testit SAT për një periudhë katër mujore. Njëri grup përdori ChatGPT, një tjetër përdori motorin e kërkimit Google dhe grupi i tretë nuk u lejua të përdorte asnjë ndihmë teknologjike.
Pastaj, studiuesit i lidhën pjesëmarrësit me pajisje EEG për të matur aktivitetin elektrik në tru.
Rezultatet treguan se përdoruesit e ChatGPT kishin nivelin më të ulët të përfshirjes së trurit dhe performuan më dobët në aspekte neurologjike, gjuhësore dhe të sjelljes. Me kalimin e kohës, ata u bënë gjithnjë e më dembelë, duke kaluar në kopjim të plotë të tekstit nga ChatGPT.
Kur iu kërkua të shkruanin ese pa ndihmën e AI, aktiviteti i tyre në valët alfa dhe beta të trurit ishte dukshëm më i ulët – një tregues i angazhimit të reduktuar mendor.
Çfarë do të thotë kjo për ne?
Autorja kryesore e studimit, Nataliya Kosmyna, deklaroi se përdorimi i AI mund të ndikojë negativisht në zhvillimin afatgjatë të trurit.
“Ajo që më shtyu ta publikoja këtë studim para se të përfundojë rishikimi shkencor, është frika se pas 6-8 muajsh ndonjë vendimmarrës do të vendosë: ‘Le të fusim GPT në çerdhe’. Kjo do të ishte katastrofike për zhvillimin e trurit, veçanërisht tek fëmijët,” u shpreh ajo për revistën TIME.
EEG-të zbuluan se përdoruesit e AI kishin kontroll ekzekutiv dhe përqendrim shumë të ulët. Deri tek eseja e tretë, ata lejonin ChatGPT të bënte gjithçka për ta.
“Ishte më shumë si: ‘ma jep esenë, rregulloje këtë fjali, redaktoje pak dhe jam gati’,” shpjegoi Kosmyna.
Nga ana tjetër, pjesëmarrësit që nuk përdorën asnjë mjet teknologjik treguan lidhje më të lartë neurale, sidomos në zonat që lidhen me krijimtarinë, ngarkesën e memories dhe përpunimin e kuptimit të tekstit.
Ata gjithashtu ishin më të përfshirë dhe më kureshtarë.
Grupi që përdori Google gjithashtu tregoi përfshirje të trurit, duke lënë vetëm përdoruesit e AI me rezultate të dobëta në çdo aspekt.
Për më tepër, përdoruesit e AI nuk mund të kujtonin për çfarë ishin esetë që kishin shkruar. “Detyra u krye, mund të thuash që ishte efikase dhe e lehtë. Por siç tregojmë në punimin tonë, asgjë nga ajo që shkruan nuk integrohej në rrjetin e memories,” shpjegon Kosmyna.
Sa për ndikimin tek studentët dhe të rinjtë, autorët shtojnë: “Është jetike të kemi edukim mbi përdorimin e këtyre mjeteve dhe të promovojmë idenë që truri ynë ka nevojë të zhvillohet në mënyrë më analoge, më natyrore”.
“Sot më shumë se kurrë, nevojitet legjislacion aktiv dhe sidomos testim para implementimit të teknologjisë.”
Pas publikimit të studimit, reagimet në rrjet ishin të forta.
Një përdorues në X shkroi: “Jemi në një luftë për njerëzinë tonë dhe ju po prishni trurin për të mos shkruar disa emaila”.
Një tjetër shtoi: “Shkëlqyeshëm, tani ChatGPT jo vetëm po më shkruan emailat, por po më vjedh edhe qelizat e trurit, cool cool”. /Prive By Liberta
