Jonida Vokshi, moderatorja e “Big Brother VIP Kosova”, ka treguar edhe një herë se zotëron një sens të shkëlqyer humori dhe di ta marrë me shumë sportivitet çdo situatë, madje edhe kur bëhet fjalë për gafa gjatë transmetimit live.
Mbrëmjen e kaluar, spektakli nuk kaloi pa një moment viral që shkaktoi të qeshura pafund në rrjet. Teksa duhej të përmendte emrin tashmë të njohur “Time”, moderatorja, ndoshta e ndikuar nga anglishtja e përditshme apo shpejtësia e të folurit, e shqiptoi atë gabimisht sipas fonetikës angleze: “Tajm”.
Ky lapsus simpatik nuk u shpëtoi “skifterëve” të rrjeteve sociale, duke u bërë menjëherë viral në TikTok dhe Instagram. Por, “qershia mbi tortë” ishte vetë reagimi i Jonidës. Pa komplekse dhe me shumë auto-ironi, ajo e ka ripostuar videon e gafës së saj në Instastory.
> “Hahahahahahahaha, ç’t’i bëjmë anglishtes,” – ka shkruar Jonida, duke qeshur me lot për situatën.
Megjithatë, përtej humorit dhe gafës momentale, duhet thënë se ky ishte “marketingu” perfekt në kohën e duhur. Duke marrë parasysh se Time është kthyer në personazhin më të komentuar të momentit jashtë shtëpisë, ky lapsus i Jonidës vetëm sa e ka përforcuar edhe më shumë vëmendjen rreth saj. Në fund të fundit, nuk mund të kishte reklamë më të mirë (dhe më virale) për Timen sesa emri i saj të dëgjohej kudo, qoftë edhe në versionin ndërkombëtar “Tajm”. /Prive By Liberta Spahiu
