Bota e muzikës ka shënuar një kapitull të ri historik pasi Taylor Swift ka arritur zyrtarisht vlerën neto prej 2 miliardë dollarësh.
Sipas raportit të fundit nga Forbes, ylli i pop-it tani mban titullin si muzikantja femër më e pasur në botë, duke lënë pas edhe emra të fuqishëm të industrisë së biznesit si Kim Kardashian.
Ky sukses i jashtëzakonshëm e pozicionon atë në një ligë më vete, pasi ndryshe nga shumë miliarderë të tjerë që pasurinë e kanë ndërtuar përmes markave të kozmetikës apo modës, perandoria e Swift buron pothuajse tërësisht nga arti i saj.
Burimet kryesore të kësaj pasurie përrallore vijnë nga të drejtat e muzikës, turnetë botërore që kanë thyer çdo rekord shikueshmërie dhe katalogu i saj i këngëve, i cili vlerësohet rreth 600 milionë dollarë.
Përveç suksesit në industrinë muzikore, këngëtarja ka investuar fuqishëm edhe në patundshmëri, ku zotëron rreth 110 milionë dollarë prona luksoze në pikat më strategjike të Shteteve të Bashkuara.
Me këtë arritje, Taylor Swift vulos dominimin e saj absolut jo vetëm si artiste, por edhe si një figurë kyçe në ekonominë globale të argëtimit.
/Prive By Liberta Spahiu
