Historia e Edon Zhegrovës, një prej futbollistëve më të dashur të Kosovës dhe tashmë pjesë e gjigantit italian Juventus, nuk është vetëm një rrugëtim i talentit dhe punës së palodhur.
Pas suksesit të tij fshihet edhe një telefonatë e papritur që ia ndryshoi jetën përgjithmonë.
Zhegrova kishte rrëfyer në emisionin e dikurshëm NIN me Alaudin Hamitin në Klan Kosova se gjithçka nisi gjatë një stërvitjeje në stadiumin e Prishtinës.
Teksa ishte në fushë, prindërit e tij po e shikonin nga tribuna, kur papritur morën një telefonatë nga aktori i njohur i humorit, Vedat Bajrami – pjesë e grupit të famshëm “Stupcat”.
“Pas stërvitjes, kam shkuar menjëherë te Vedati ashtu siç kam qenë. Dhe ai më tregoi se e njeh një shqiptar të suksesshëm në Belgjikë, i cili ka lidhje me futboll. Dy javë më pas, ai erdhi të më shihte duke luajtur dhe në atë ndeshje shënova pesë gola,” – ka rrëfyer Zhegrova.
Nga ai moment, rruga e talentit të ri mori drejtim tjetër. Falë besimit dhe ndihmës së Bajramit, ai u vu në pah nga njerëzit e duhur dhe gradualisht nisi karrierën e tij ndërkombëtare, e cila e ka çuar deri te një nga klubet më prestigjioze në botë, Juventus.
Ky episod dëshmon se shpesh një telefonatë, një takim apo një njeri që beson tek ti, mund të bëhet pika e kthesës së madhe në jetë. Për Zhegrovën, ajo telefonatë nga Vedat Bajrami nuk ishte thjesht një rastësi, por çelësi që hapi derën e suksesit.
Sot, Zhegrova është një nga futbollistët më të pëlqyer në Kosovë dhe një shembull frymëzimi për shumë të rinj që ëndërrojnë të ndjekin gjurmët e tij. /Prive By Liberta Spahiu
View this post on Instagram
