Një fluturim i Air India nga Hong Kong në drejtim të New Delhit është detyruar të kthehet pas vetëm një ore fluturim për shkak të një problemi teknik të dyshuar, duke ndodhur vetëm disa ditë pas tragjedisë ajrore që mori jetën e të paktën 270 personave.
Fluturimi AI315, i realizuar me një Boeing 787-8 Dreamliner, u nis nga Hong Kongu në orën 12:16 pasdite (ora lokale) dhe u kthye në aeroportin e nisjes pas një ore, rreth orës 1:15 pasdite.
Një nga pilotët kishte njoftuar kontrollin ajror se kishte dyshime për një problem teknik dhe se nuk do të vazhdonin fluturimin më tej për sigurinë e pasagjerëve.
Pas uljes së sigurt, të gjithë pasagjerët u evakuan dhe avioni është dërguar për inspektim teknik .
Ky incident ndodhi vetëm katër ditë pas rrëzimit tragjik të fluturimit AI171 të Air India në Ahmedabad, ku humbën jetën 241 pasagjerë dhe një person mbijetoi.
Hetimet për këtë ngjarje janë ende në vazhdim, duke përfshirë analizën e dy kutive të zeza dhe shqyrtimin e mundësive të tilla si gabime piloti, goditje zogjsh, ose defekte mekanike .
Kryetari i Air India, N. Chandrasekaran, e cilësoi këtë tragjedi si krizën më të rëndë të karrierës së tij dhe theksoi nevojën për forcimin e masave të sigurisë ajrore.
Ai u bëri thirrje punonjësve të mbeten të përkushtuar për përmirësimin e standardeve të sigurisë, pavarësisht kritikave të shumta .
Ky incident ka ngritur shqetësime të mëtejshme për sigurinë e fluturimeve, veçanërisht pas ngjarjeve të fundit, duke i shtuar pasigurinë udhëtarëve ajrorë në mbarë botën. /Prive By Liberta Spahiu
