Autopsitë e kryera mbi katër anëtarët e një familjeje që u gjetën të vrarë të hënën, treguan se ata humbën jetën nga duart e Emily Long, 34 vjeçe, e cila më pas kreu vetëvrasje. Viktimat janë bashkëshorti i saj, Ryan Long, 48 vjeç, dhe dy fëmijët e tyre, Parker (8) dhe Ryan (6).
Sipas Zyrës së Prokurorit të Përgjithshëm, ngjarja ndodhi në orët e para të mëngjesit të së hënës, më 18 gusht 2025, në banesën e familjes në Madbury. Hetimet tregojnë se Emily Long mori një armë zjarri në shtëpi, qëlloi burrin e saj disa herë – i cili vuante nga një tumor në tru – si dhe dy fëmijët me nga një plumb në kokë, përpara se të qëllonte veten.
Rezultatet e autopsisë
-
Ryan Long: vdiq nga plagë të shumta me armë zjarri, vrasje.
-
Emily Long: një plumb në kokë, vetëvrasje.
-
Parker Long (8) dhe Ryan Long (6): nga një plumb në kokë secili, vrasje.
Një fëmijë tjetër i familjes, më i vogël, ishte në shtëpi në momentin e ngjarjes por shpëtoi pa lëndime dhe aktualisht ndodhet nën kujdesin e të afërmve.
Autoritetet theksuan se, edhe pse po hetohen çështje dhe probleme të mundshme brenda familjes, “nuk duhet të spekulohet se ngjarja ka ardhur vetëm nga një arsye apo një faktor i vetëm”.
Profili i viktimave
Ryan Long punonte prej 9 vitesh si psikolog shkollor në distriktin shkollor Oyster River dhe së fundmi si lektor në Universitetin Plymouth State. Ai ishte psikolog i licencuar dhe analist i sjelljes.
Emily Long ishte diplomuar për menaxhim në Universitetin e New Hampshire dhe kishte punuar si Drejtore Operacionesh në kompaninë Wing-itz Restaurant Group. Së fundmi ishte në kërkim të një pune të re.
Në rrjetin TikTok, ku kishte rreth 5,600 ndjekës, Emily shpesh publikonte video për betejën e bashkëshortit me kancerin në tru, vështirësitë e familjes dhe gjendjen e saj emocionale. Ajo e përshkruante veten si “nënë e tre fëmijëve – bashkëshorte e një pacienti me kancer në tru” dhe e quante faqen e saj “ditar digjital, më i lirë se terapia”.
Në një prej postimeve të fundit, ajo shkruante:
“Gjithçka që dua të bëj është të fshihem nën një batanije me fëmijët e mi, por kjo nuk është e shëndetshme as për ta, as për mua. Sot vendosa të bëj një përpjekje të vetëdijshme për të ndryshuar mendësinë. Do të dal nga kjo depresion, dua apo jo.”
Pas ngjarjes, faqja e saj në TikTok nuk është më e qasshme për publikun. /Prive By Liberta Spahiu
