Nutricionistja e njohur Diola Dosti, ka emocionuar ndjekësit e saj me një rrëfim prekës në Instagram, duke ndarë kujtime personale nga koha e luftës në Kosovë.
Në një postim të gjatë, ajo tregoi se si familja e saj në Shqipëri hapi zemrën dhe dyert për një familje kosovare që ishte detyruar të largohej nga shtëpia e vet gjatë luftës Kosovë–Serbi në vitin 1999.
“Ishte viti 1999, kur zemra dhe dyert e familjes time, në vendlindjen time në Shqipëri, u hapën për këtë familje shqiptare nga Kosova, në kohën e luftës Kosovë–Serbi. Një familje e madhe që u bënë familja jonë!”, shkruan Diola.
Ajo kujton me nostalgji se si zonja e shtëpisë, e cila tashmë nuk jeton më, i kishte lënë një kujtim të pashlyeshëm me gatimet tradicionale kosovare.
“Më kujtohet që kur provova bukën që gatuante, më bëri të doja një herë e përgjithmonë gatimet e Kosovës, ato kiflet, pitet e specat me mazë!” – rrëfen Diola.
Në postimin e saj, Diola ndalet edhe tek miqësia e ngushtë me Mirlinda Berishën, vajzën e familjes kosovare, që ajo e konsideronte si motrën që i mungonte.
“Vizatonim bashkë, sidomos Sailor Moon, dilnim shëtitje pasdite, bënim xhiro me biçikletë dhe unë isha shumë e lumtur që më fund kisha motrën e munguar pranë meje!”, kujton ajo me emocion.
Ajo shtoi se babai i saj kishte pasur një kujdes të veçantë për vajzat e kësaj familjeje, duke dhënë edhe një lloj “garancie” në qytet që askush të mos i ngacmonte. Pas mbarimit të luftës, ishte pikërisht babai i Diolës ai që i kishte shoqëruar personalisht për t’i kthyer në shtëpinë e tyre në Malishevë, e cila, fatkeqësisht, ishte djegur.
Pas 25 vitesh, Diola rrëfen se është ritakuar me pjesën më të madhe të kësaj familjeje.
“E sot, pas 25 viteve, ne u ritakuam me pothuajse të gjithë familjen… Ajo që mund të them është që këta njerëz më kanë bërë të dua një herë e përgjithmonë çdo gjë që ka të bëjë me Kosovën. Linja ime e jetës e vërteton këtë!” – shkruan ajo.
Moderatorja nuk fsheh emocionet e saj për lirinë e Kosovës dhe mirënjohjen e thellë që ruan për këtë lidhje të veçantë.
“Jam shumë e lumtur që sot Kosova gëzon lirinë me njerëz të mrekullueshëm sepse edhe pse s’kam qenë prezente në luftë, gjithçka të përjetuar nga kjo familje në Malishevë, e kemi ndarë dhe ndjerë bashkë. Ju dua fort dhe Zoti ju bekoftë!”
Postimi i Diolës është pritur me shumë emocion nga ndjekësit, duke marrë qindra komente mbështetëse, teksa historia e saj shërben si kujtesë e fuqishme për mikpritjen shqiptare dhe lidhjen e pathyeshme mes Shqipërisë dhe Kosovës. /Prive By Liberta Spahiu
View this post on Instagram
