Familja e Doriana Hakës, bashkëshortes së portierit Alban Hoxha, e cila ndërroi jetë në nëntor të vitit 2014, vetëm dy javë pasi solli në jetë fëmijën e tyre të parë, vijon të kërkojë drejtësi për vdekjen e saj tragjike.
Në një deklaratë emocionale gjatë një seance gjyqësore, Hamide Haka, nëna e Dorianës, shprehu dhimbjen e saj të thellë dhe indinjatën për zvarritjen e çështjes në sistemin gjyqësor për më shumë se një dekadë.
“Kemi 11 vite që presim drejtësi. Gjatë seancës pati një ballafaqim mes ekspertëve, me pyetje dhe përgjigje – zgjati pak gjatë dhe u revoltova, nuk munda të hesht më. Fola në sallë me shpresën që gjyqtarët do ta marrin parasysh dhimbjen tonë. Më dhemb shpirti, më copëtohet zemra.
Shpresoj te një drejtësi e vonuar, por jo e harruar. Dori im meriton drejtësi. Një fëmijë që rritet pa nënë meriton drejtësi. Ju lutem, zoti gjyqtar, më shikoni – nuk kërkoj asgjë tjetër, vetëm drejtësi, drejtësi pa fund”, u shpreh ajo me lot në sy.
Edhe Enver Haka, babai i të ndjerës, theksoi zhgënjimin e familjes nga zvarritja e pafundme e procesit gjyqësor, veçanërisht në Gjykatën e Apelit, ku çështja ka mbetur pezull prej vitesh.
“Kam 11 vite që bredh nëpër gjykata, që kërkoj një të drejtë që nuk po na jepet. Çështja po shtyhet vazhdimisht. Tashmë janë bërë 3 vite në Apel dhe ende asnjë vendim.
Dua vetëm drejtësi. Nuk do të ndalem derisa të kem frymë. Nuk do ta fal. Pres vetëm drejtësi – asgjë më shumë. Sytë i kam vetëm nga gjykata, nga vendimi që do japin gjyqtarët”, tha ai me vendosmëri.
Avokati i familjes Haka, Bashkim Sulstarova, deklaroi për News 24 se trupa gjykuese në Gjykatën e Apelit ka dëgjuar ekspertët dhe se tashmë pritet që vendimi të mbështetet mbi prova dhe ligj.
“Edhe ne, ashtu si familjarët, presim drejtësi. Besojmë që trupa gjykuese, duke analizuar provat në mënyrë të drejtë dhe të plotë, do të japë një vendim të bazuar në ligj dhe në faktet e paraqitura”, tha Sulstarova.
Doriana Haka ndërroi jetë në nëntor të vitit 2014, vetëm dy javë pas lindjes së fëmijës së saj të parë, në një rast që familjarët e konsiderojnë si neglizhencë mjekësore dhe për të cilin vijojnë të kërkojnë zbardhjen e plotë dhe vendosjen e drejtësisë.
