Një operacion i madh antidrogë ka shkaktuar një “tërmet” të vërtetë në botën e artit, sportit dhe shoqërisë së lartë në Turqi. Aktorja dhe modelja e famshme, Hande Erçel, është përfshirë në këtë hetim të bujshëm, ndërkohë që ish-i dashuri i saj, miliarderi Hakan Sabancı, ka përfunduar tashmë në pranga.
Sipas raportimeve nga media turke Haberler, Kryeprokuroria Publike e Stambollit ka lëshuar urdhër-ndalimi për 16 persona me profil të lartë publik. Deri më tani, autoritetet kanë arrestuar 14 prej tyre. Në listën e emrave të njohur, përveç Hande Erçel dhe Hakan Sabancı, figurojnë edhe ish-presidenti i Galatasaray-t, Burak Elmas, ish-presidenti i Beşiktaş-it, Fikret Orman, Kerim Sabancı, si dhe modelet Didem Soydan dhe Güzide Duran.
Situata e aktores dhe reagimi i saj
Mediat në Turqi raportojnë se policia nuk ka mundur ta ndalojë Hande Erçel pasi ajo aktualisht ndodhet jashtë vendit. Megjithatë, urdhërarresti është aktiv dhe ajo pritet të arrestohet në aeroport sapo të rikthehet në tokën turke.
Pas lajmeve që pushtuan mediat, aktorja ka thyer heshtjen duke reaguar përmes një deklarate zyrtare në llogarinë e saj në Instagram. Ajo sqaroi se ndodhet jashtë shtetit për studime dhe theksoi se do të përballet me drejtësinë për të zbardhur të vërtetën.
“Kam rreth një muaj që ndodhem jashtë shtetit për shkak të shkollimit tim. Mbrëmë, ashtu si ju, u njoha me këtë çështje nga raportimet në lajme. Do të kthehem në vendin tim për të sqaruar situatën, për të bërë deklaratat e nevojshme dhe për të dhënë dëshminë time,” – shkruan Erçel në postimin e saj.
Ajo e ka mbyllur mesazhin duke shprehur besim të plotë te institucionet: “Jam një njeri që e dua vendin tim dhe kam besim te qeveria dhe drejtësia turke. Besoj se kjo situatë do të sqarohet sa më shpejt të jetë e mundur.” /Prive By Liberta Spahiu
