Ish-banorja e Big Brother VIP Kosova, Alba Pollozhani, ka tërhequr vëmendjen e publikut pas një deklarate të fortë të bërë në natën Prime, pak para se të eliminohej nga gara.
Ajo u shpreh se kishte marrë vendimin për t’u mbuluar me shami sipas rregullave të fesë islame, një vendim që ngjalli interes dhe reagime të shumta.
Së fundmi, përmes një postimi InstaStory, Alba ka vendosur të sqarojë më gjerë ndjesitë e saj dhe rrugëtimin shpirtëror që po kalon, duke theksuar se ky është një vendim shumë personal dhe me peshë të madhe.
Në reagimin e saj, Alba thekson se feja ka qenë gjithmonë pjesë e jetës së saj, pasi është rritur në një mjedis besimtar.
“Të rritesh në një familje të përkushtuar ndaj fesë islame dhe ta ndjesh vetë si bindje personale vendosjen e shamisë është një hap i madh,” – shkruan ajo.
Ajo ka vlerësuar “nijetin” (qëllimin) e pastër që i lindi gjatë qëndrimit të saj në shtëpinë e BBVK, duke e konsideruar këtë dëshirë të zemrës si një dhuratë.
Për të mos e marrë këtë vendim me nxitim ose thjesht për t’u dukur, ish-banorja ka ndarë faktin se është konsultuar me njerëz të ditur të fesë. Ajo shpjegon se ata e kanë këshilluar që ky proces të vijë në mënyrë graduale.
“Fakti që u këshillova me njerëz që e përfaqësojnë me dinjitet fenë dhe ata më sugjeruan ‘hap pas hapi’ tregon urtësi.”
Në mbyllje të mesazhit të saj, Alba thekson se për të, mbulesa nuk është thjesht një ndryshim i jashtëm estetik, por një proces që kërkon një pjekuri të lartë shpirtërore dhe transformim të brendshëm.
“Në islam, përgatitja e brendshme është po aq e rëndësishme sa edhe pamja e jashtme. Shamija nuk është vetëm një mbulesë, por një përgjegjësi shpirtërore, sjellje, durim dhe përkushtim!”
Me këtë mesazh, Alba duket se u jep fund spekulimeve, duke treguar se deklarata e saj në Prime ishte një dëshirë e sinqertë, të cilën ajo po e merr me maturinë dhe seriozitetin e duhur, pa u nxituar në veprime. /Prive By Liberta Spahiu
