Një video e postuar në Instagram ka ndezur polemika të mëdha në Turqi dhe e ka futur në telashe një turiste nga Bosnja e Hercegovina.
Vajza, e njohur me pseudonimin @blittem, u pa duke bërë pole dancing mbi një shtyllë flamuri kombëtar në majë të Kalasë së Uçhisarit në Kapadokia, një prej pikave më të vizituara nga turistët në vend. Pamjet që ajo i shpërndau me ndjekësit e saj u përhapën me shpejtësi, por në vend që të sillnin duartrokitje, shkaktuan zemërim të madh publik.
Autoritetet turke nuk e morën aspak lehtë këtë veprim. Zyra e Prokurorit të Përgjithshëm në Nevşehir ka hapur një hetim penal për “ofendim ndaj flamurit kombëtar”, vepër që sipas ligjit turk mund të dënohet me deri në pesë vite burg.
Deputeti i partisë në pushtet, Emre Çalişkan, reagoi ashpër duke thënë se “flamuri është nderi dhe sytë tanë, dhe askush nuk guxon ta përdhosë atë”.
Historia ka ngjallur debat të madh edhe në rrjete sociale. Disa e shohin si shkelje të rëndë të simboleve kombëtare, ndërsa të tjerë si një provokim të panevojshëm për pak vëmendje. Ndërkohë, vetë turistja ka mbetur e paidentifikuar plotësisht përtej pseudonimit në Instagram, dhe nuk dihet nëse ajo ende ndodhet në Turqi apo është larguar tashmë.
Rasti po komentohet gjerësisht si një shembull se si një video e shkurtër në rrjete sociale mund të përkthehet në pasoja të rënda ligjore për protagonistin. Në këtë rast, një vallëzim që u pa si argëtues nga disa, mund t’i kushtojë asaj me vite të tëra pas hekurave. /Prive By Liberta Spahiu
