Aktorja dhe mikja e vjetër e Selena Gomez, Francia Raisa, ka reaguar pas zërave që po qarkullojnë për një përplasje mes tyre, pasi ajo nuk mori pjesë në dasmën e Selenës me Benny Blanco.
View this post on Instagram
Raisa, e njohur për rolin në serialin “Grown-ish”, i dha Selenës një nga dhuratat më të mëdha të mundshme në vitin 2017, kur i dhuroi një veshkë. Këngëtarja e famshme vuante nga lupusi, një sëmundje autoimune, dhe kishte nevojë për transplant urgjent.
Në atë kohë, Selena falënderoi publikisht Francian me një postim emocional në Instagram:
“Nuk ka fjalë për të përshkruar mirënjohjen që kam për mikeshën time të bukur, Francia Raisa. Ajo më dha dhuratën dhe sakrificën më të madhe. Jam e bekuar pafund. Të dua shumë, motra ime.”
Kur u publikuan listat e të ftuarve për dasmën e Selena Gomez dhe Benny Blanco, shumë fansa vunë re se emri i Francias mungonte, gjë që ngriti sërish dyshime për një ftohje në raportin e tyre.
Por vetëm pak ditë para dasmës, Francia vendosi të sqarojë gjithçka. Në një intervistë gjatë një eventi në një librari, ajo foli në spanjisht, duke uruar mikeshën e saj për martesën.
“E di që po martohet dhe jam shumë e lumtur për të. Ajo ka jetën e saj, tashmë është miliardere, dhe unë jam mirënjohëse që munda ta ndihmoj në atë moment,” – tha ajo.
Aktorja gjithashtu foli për keqkuptimet rreth dhurimit të organeve, duke theksuar se dhurimi duhet parë si një akt bamirësie, jo si një lidhje që detyrimisht duhet të zgjasë përjetë.
“Që në fillim mjekët më thanë se është një dhurim.
Kur dhuron një dollar për një kauzë, nuk e telefonon më pas për të pyetur ‘çfarë bëre me dollarin tim?’.
Edhe ky ishte një dhurim, dhe jam mirënjohëse që munda të shpëtoj një jetë,” – shpjegoi ajo.
Kjo nuk është hera e parë që qarkullojnë thashetheme për një ftohje mes dyshes. Në vitin 2022, fansat vunë re tensione pasi Selena në një intervistë tha se “e vetmja mikeshë e saj në industri është Taylor Swift”.
Francia reagoi duke komentuar me një “Interesting” (interesante) në një postim në Instagram, koment që më pas e fshiu. Selena iu përgjigj me një ton të butë:
“Më fal që s’i përmenda të gjithë ata që njoh.”
Megjithatë, në vitin 2023, Gomez hodhi poshtë çdo zë për armiqësi, duke treguar edhe njëherë mirënjohje ndaj Francias.
“Nuk do të jem kurrë më shumë në borxh ndaj një personi sesa ndaj Francias. Ideja që dikush të dhurojë pa u menduar dy herë për mua ishte diçka e pabesueshme,” – u shpreh këngëtarja në një intervistë për Apple TV+.
Në fund, edhe pse Francia Raisa nuk ishte e pranishme në dasmën e Selena Gomez, duket se midis tyre nuk ka asnjë përplasje, vetëm respekt dhe kujtime të forta që i lidhin përgjithmonë. /Prive By Liberta Spahiu
