Këngëtari i njohur Xuxi ka reaguar ashpër pas përfundimit të Festivalit të Këngës në RTK, ku ai konkurroi me këngën “Identitet”.
Përmes një postimi në rrjetet sociale, Bunjaku ka lëshuar akuza të forta ndaj jurisë së festivalit dhe ka kritikuar ashpër një segment të prezantimit nga moderatorët, të cilin e ka konsideruar “denigrues dhe të pavend”.
Duke folur për vlerësimin, Bunjaku ironizoi procesin e votimit, duke thënë se nuk ndihet i lënduar pasi, sipas tij, rezultati dihej paraprakisht.
“Nuk më ka lënduar votimi i jurisë mbrëmë – sepse të gjithë e dimë se tek ne në festivale ‘fitojnë’ emrat e kompozitorëve, të favoriteve të tyre e anëtarëve të jurisë që i mbledhin nëpër pube natën ku bëjnë muzikë,” shkroi këngëtari, duke aluduar për prapaskena në përzgjedhjen e fituesve.
Megjithatë, pika më e ndjeshme për të, që e shtyu të reagonte, ishte një skenar i prezantuesve të festivalit.
“Por ajo që më dhemb është skenari i ndërtuar rreth ‘lahutistit’ – kinse për të kujtuar Mixhen Ramë – sepse kjo ishte denigruese dhe e pavend,” vazhdoi ai.
Xuxi sqaroi se elementet e performancës së tij nuk ishin thjesht “kostum skene”, por kishin një domethënie më të thellë kombëtare.
“Ato tirqi dhe ajo Lahutë nuk janë ‘kostum skene’ – janë IDENTITET. Janë rrënjët tona, historia jonë, gjaku ynë,” theksoi ai.
Duke vënë në pah karrierën e tij mbi 40-vjeçare “të ndërtuar mbi skenën e të kënduarit live e jo playback”, Bunjaku tha se vlerësimin e vërtetë e mori nga publiku. “Publiku foli qartë mbrëmë, dhe për mua, ai është çmimi më i madh.”
Në mbyllje, ai shprehu zhgënjimin e tij për, siç e quajti ai, mungesën e ndryshimit në festival.
“Sapo u rrit shpresa se ky festival do të ecë përpara pa mashtrime e vendime inatçore, u zhgënjeva prapë. Mund ta urreni Xuxin, ama këngën kurrë. Ajo këngë meritonte të jetë në piedestal,” përfundoi reagimi i Xuxit. /Prive By Liberta Spahiu
