Artisti i njohur Ylli Limani ka bërë një gjest bujar duke dhuruar 10,000 euro për projektin e ri të festivalit ndërkombëtar të filmit DokuFest, “DokuFest Green Cinema”.
Ky projekt synon realizimin e një kineme plotësisht të qëndrueshme dhe miqësore me mjedisin, e mbështetur tërësisht nga burime të energjisë së pastër. Ai vjen si hap i radhës pas suksesit të nismës “Solar Cinema”, e cila prej vitesh ka sjellë shfaqje filmash në hapësira të hapura dhe falas për publikun, duke arritur deri në zonat më të largëta të Kosovës.
Në reagimin e tyre publik, organizatorët e DokuFest-it kanë shprehur mirënjohjen për këtë kontribut, duke thënë:
> “Faleminderit nga zemra Ylli Limanit që iu bashkua dhe i besoi vizionit të festivalit tonë për një kulturë të qëndrueshme. Për një kinema që nuk e dëmton planetin.”
Ata theksuan se mbështetja e Ylli Limanit është një hap i rëndësishëm drejt realizimit të vizionit për një kinema që jo vetëm reflekton realitetin, por edhe kontribuon në ndryshimin e tij.
Ky veprim i artistit erdhi pak orë para se ai të ngjitej në skenën e DokuNights, ku solli një performancë të ngrohtë dhe të pëlqyer nga publiku, duke e kthyer mbrëmjen në një kujtim të veçantë si për adhuruesit e muzikës, ashtu edhe për ata të kinemasë. /Prive By Liberta Spahiun
