Ylli i NBA-së dhe agjenti i lirë Malik Beasley është aktualisht objekt i një hetimi federal nga Zyra e Prokurorit të SHBA, në lidhje me akuza për përfshirje në aktivitete bastesh gjatë kohës që luante për Milwaukee Bucks në sezonin 2023–2024.
Sipas burimeve të ESPN, hetimi ka të bëjë me sezonin e kaluar, kur Beasley, tani 28 vjeç, bëri 77 paraqitje si titullar, duke shënuar mesatarisht 11.3 pikë për ndeshje.
Sipas burimeve, autoritetet po shqyrtojnë nëse ka pasur përfshirje të Beasley në baste mbi performancën personale, një veprim i ndaluar rreptësisht nga NBA.
Në një deklaratë për revistën PEOPLE, avokati i tij, Steve Haney, theksoi se:
“Fakti që ekziston një hetim nuk do të thotë që Malik është akuzuar për ndonjë krim. Nuk do të thotë që ka bërë diçka të gabuar apo që është përjashtuar nga basketbolli.”
Haney shtoi më tej:
“Kam pasur shumë klientë që janë hetuar federalisht dhe nuk janë akuzuar kurrë. Hetimi nuk nënkupton automatikisht faj.”
Zëdhënësi i NBA-së, Mike Bass, konfirmoi se liga po bashkëpunon me hetuesit federalë, por nuk dha detaje shtesë.
Ndërkohë, një përfaqësues i Detroit Pistons, ekipi ku Beasley luajti sezonin e fundit me një kontratë njëvjeçare prej 6 milionë dollarësh, tha për ESPN se janë të vetëdijshëm për hetimin, por se nuk do të komentojnë më tej për momentin.
Nuk është e qartë nëse hetimi aktual do të ndikojë në negociatat për një kontratë të re për sezonin 2025–2026, por hetimi vjen në një kohë kur NBA po përballet me presion në rritje mbi përfshirjen e lojtarëve në bastet sportive, sidomos në epokën e legalizimit të tyre në shumë shtete amerikane.
Ky është rasti i dytë brenda pak muajsh që një lojtar i NBA-së përfshihet në hetime federale për çështje bastesh.
Më parë, në janar, Terry Rozier i Miami Heat ishte nën hetim për baste të dyshimta në një ndeshje të marsit 2023 ndaj Charlotte Hornets. Rozier nuk është akuzuar dhe nuk është pezulluar deri tani. /Prive By Liberta Spahiu
