Sunny Hill Festival ka zbuluar një nga emrat më të mëdhenj të line-up-it për edicionin e vitit 2025 — superyllin e muzikës elektronike, Peggy Gou. E njohur në mbarë botën për miksimet e saj të jashtëzakonshme që ndërthurin house-in dhe techno-n, DJ dhe producentja koreane do të jetë një nga performueset kryesore në festivalin që mbahet në Prishtinë nga 1 deri më 3 gusht.
Në një postim zyrtar në Instagram, organizatorët e Sunny Hill shprehën entuziazmin për konfirmimin e saj: “Nga klubet underground te festivalet masive, Peggy është bërë simbol i kulturës globale të muzikës dance.” Ajo pritet të ndezë atmosferën në skenën C4 këtë verë, duke sjellë me vete energjinë që e ka bërë një ikonë të skenës ndërkombëtare.
Peggy Gou, e cila ka performuar në skena të mëdha si Coachella dhe Tomorrowland, është e njohur për stilin unik që kombinon ritmet e ashpra me meloditë nostalgjike, shpesh të frymëzuara nga vitet ’90. Me një prani të fortë vizuale dhe artistike, ajo ka ndikuar gjithashtu në modë dhe kulturë, duke e kthyer veten në një figurë të shumëdimensionale.
Sunny Hill Festival, i themeluar nga Dua Lipa dhe familja e saj, është kthyer tashmë në një prej ngjarjeve më të mëdha muzikore në Ballkan. Festivali jo vetëm që sjell artistë ndërkombëtarë, por edhe promovon kulturën dhe turizmin e Kosovës.
Lista e plotë e artistëve pritet të shpallet së shpejti, por me emra si Peggy Gou në qendër të vëmendjes, pritshmëritë janë më të larta se kurrë. /Prive By Liberta Spahiu
View this post on Instagram
