Sipas informacioneve të siguruara nga gazetarja Ceylan Sever, dëshmia e aktores së njohur turke Hande Erçel ka dalë së fundmi në dritë, pas disa lajmeve dhe aludimeve që kanë qarkulluar në media.
Aktorja, e cila gëzon një popullaritet të madh ndërkombëtar, ka mohuar kategorikisht çdo lidhje me organizime të paligjshme apo përdorimin e substancave të ndaluara, duke mbrojtur figurën e saj dhe të partnerit të saj, biznesmenit Hakan Sabancı.
Në dëshminë e saj të plotë, Erçel thekson përkushtimin e saj ndaj karrierës, arsimit dhe një jetese të shëndetshme, duke u shprehur:
“Aktualisht vazhdoj studimet në Universitetin e Arteve të Bukura ‘Mimar Sinan’. Nuk kam jetë nate. Merrem me aktrim. Nga ambientet e ndryshme të përmendura në dosje, kam shkuar vetëm disa herë në pjesën e restorantit të Hotelit për takime pune.”
Aktorja ka sqaruar se nuk ka asnjë lidhje me personat apo ngjarjet e përfolura:
“Nuk kam marrë pjesë në asnjë festë apo event privat, të përfolur në media, që pretendohet se është organizuar nga biznesmenë të caktuar. Nuk njoh asnjë person të përmendur në dosje që organizon festa të tilla dhe nuk kam qenë kurrë në dijeni apo e ftuar në to.”
Për sa i përket aludimeve për substanca të palejuara, Hande u tregua e prerë:
“Në asnjë periudhë të jetës sime nuk kam përdorur substanca të tilla. Për shkak të profesionit tim, kujdesem për një jetesë të shëndetshme. Gjithashtu, nuk e kam parë asnjëherë Hakan Sabancı-n të përdorë substanca të tilla.”
Në fund të deklaratës së saj, ylli i kinematografisë turke shprehu keqardhjen për përfshirjen e emrit të saj në këtë çështje, duke kujtuar përgjegjësinë që ka ndaj publikut:
“Kam rreth 13 vite që dal në ekran, dhe duke qenë e vetëdijshme që kam një audiencë që mund të ndikoj, gjithmonë kam pasur kujdes me mënyrën e jetesës, duke u përpjekur të jem shembull për të gjithë dhe ta përfaqësoj vendin tim në mënyrën më të mirë. Ndiej keqardhje që emri im përmendet në këtë formë në një dosje të tillë dhe nuk i pranoj akuzat e ngritura ndaj meje.”
/Prive By Liberta Spahiu
