Portali Kallxo.com ka siguruar dosjen e Astrit Isufit, personit që dyshohet për vrasjen e dy vëllezërve në fshatin Gollubovc të Malishevës, ngjarje që tronditi opinionin publik ditë më parë.
Në dosje përfshihen të dhëna të hollësishme për të kaluarën e tij dhe rastet e mëparshme për të cilat ai kishte rënë në kontakt me organet e drejtësisë.
Sipas dokumenteve që ka siguruar Kallxo.com, Astrit Isufi ishte dënuar më herët nga Gjykata në Prishtinë, Dega në Drenas për një rast të ndodhur më 30 mars 2025, gjatë ditës së festës së Bajramit.
Në dosje përshkruhet se atë ditë, në shtëpinë e tij kishte ndodhur një konflikt familjar, i cili kishte shkaktuar tensione dhe pasiguri tek bashkëshortja e tij dhe fëmijët.
Dokumenti shpjegon se pas incidentit, Astrit Isufi kishte bërë edhe deklarata kërcënuese ndaj bashkëshortes, duke i shkaktuar frikë dhe ankth për sigurinë e saj dhe të familjes.
Për këtë rast, gjykata e kishte dënuar me 154 ditë burg dhe gjoba shtesë në vlerë prej disa qindra eurosh për veprën e dhunës në familje dhe kanosjes, siç thuhet në dosjen e publikuar nga Kallxo.com.
Ngjarja e përmendur në dosje ndodhi disa muaj para rastit aktual për të cilin Astrit Isufi po hetohet, lidhur me vrasjen e dy vëllezërve në Malishevë. Ky fakt, sipas burimeve, ka bërë që hetimet aktuale të përfshijnë edhe shqyrtimin e rasteve të mëparshme të tij.
Në dosje theksohet se sjellja e përsëritur dhe konfliktet e brendshme familjare kishin qenë të njohura për autoritetet përpara se të ndodhte rasti i fundit.
Burime të afërta me hetimin thonë se këto të dhëna po analizohen si pjesë e profilit të plotë të të dyshuarit.
Kjo nuk është hera e parë që detaje nga dosjet gjyqësore zbulojnë prapaskena të historive kriminale që më vonë shokojnë opinionin.
Rasti i Astrit Isufit mbetet aktualisht në fazën e hetimeve, ndërsa organet e drejtësisë po punojnë për zbardhjen e plotë të ngjarjes. /Prive Bruto
Burimi: Kallxo.com
