Shpeshherë e kemi pyetur veten se çfarë ndodhet në ndërtesën më misterioze, e cila ndodhet në hyrje të Tiranës. Kanë qarkulluar spekulime nga më të ndryshmet, si kazinotë, prostitucioni, kartelat e drogës, etj. Mirëpo, mesa duket, këtij misteri i erdhi fundi.
Një nga gazetarët më të njohur, Blendi Fevziu, ka ndarë me ndjekësit e tij në YouTube një video mbi njërën prej ndërtesave më misterioze në Shqipëri. Kureshtjen, Blendi e nisi duke treguar pronarin e kësaj ndërtese, Besim Elashnin, i cili prej më shumë se 14 vitesh merret me ndërtimin e saj, deri në detajin më të vogël. Kjo ndërtesë tani më do shfrytëzohet si hotel.
Duke filluar që nga hyrja e hotelit, e cila është e gjitha e punuar me dorë, e deri te statujat që janë të veshura me fletë ari dhe te dyshemeja që është punuar me dru nga më cilësorët, gjithçka e bën këtë hotel një nga më të shtrenjtët në Shqipëri, e ndoshta edhe në gjithë Evropën.
Ajo që vlen të përmendet është edhe përdorimi i produkteve ekskluzivisht vetëm për këtë hotel, të prodhuara nga Shqipëria, Brazili, Franca e shumë vende të tjera nga e gjithë bota.
Një gjë është e sigurt, një natë në këtë hotel do të jetë e paharrueshme, pasi siç shihet pronari i hotelit ka menduar për çdo detaj, që mysafirët të shijojnë luksin që ky hotel ofron. Prive by Liberta Spahiu
