Është zbuluar shkaku i vdekjes së Ozzy Osbourne, një javë pas varrimit të tij.
Frontmeni i grupit legjendar Black Sabbath, u nda nga jeta në moshën 76-vjeçare më 22 korrik, pak kohë pasi mbajti koncertin e tij të fundit në Villa Park.
Osbourne kishte vuajtur prej vitesh nga probleme serioze shëndetësore, kryesisht të lidhura me lëndimet në qafë të pësuara gjatë një aksidenti me katërçikël në vitin 2003. Gjendja e tij u përkeqësua më tej pas një rrëzimi në vitin 2019, vit në të cilin iu diagnostikua edhe me sëmundjen e Parkinsonit. Ai gjithashtu kaloi një periudhë të vështirë nga Covid-19.
Sipas The New York Times, certifikata zyrtare e vdekjes e lëshuar nga autoritetet shënon si shkak kryesor të vdekjes “infarkt akut të miokardit” dhe “arrestit kardiak jashtë spitalit”, që nënkupton një atak kardiak me pasoja fatale. Gjithashtu, në dokument përmenden edhe sëmundja e arterieve koronare dhe Parkinsoni me disfunksion autonom si bashkëshkaktarë të vdekjes.
Certifikata është dorëzuar nga vajza e tij, Aimée Osbourne, dhe në të theksohet profesioni i Ozzy-t si: “Kantautor, Performues dhe Legjendë Rock-u”.
Mijëra fansa mbushën rrugët e Birminghamit, për t’i dhënë lamtumirën e fundit “Princit të Errësirës”, siç quhej vetë Osbourne. Makina mortore bëri një procesion nga shtëpia e tij e fëmijërisë në Aston, drejt Broad Street, ku ndaloi pranë stolit dhe urës së Black Sabbath, duke u kthyer në një moment prekje për familjen që vendosi lule dhe lexoi mesazhet prekëse të fansave.
Grupi Black Sabbath, me Osbourne në krye, njihet gjerësisht si krijuesi i muzikës heavy metal, duke ndikuar breza të tërë muzikantësh në mbarë botën.
