Podcasti i paralajmëuar mes Burim Pacolli dhe Ghetto Geasy nuk do të publikohet!
Për këtë ka njoftuar Burimi përmes një postimi në llogarinë e tij në Facebook.
Burim Pacolli u shpreh se episodi i paralajmëruar i podcastit me Ghetto Geasyn nuk do të publikohet, të paktën jo në formën e tij të plotë. Sipas tij, materiali nuk përmbushi standardet etike dhe profesionale që ai i vendos për veten, duke e cilësuar mungesën e transparencës si një pengesë kryesore.
“Kom rikëqyrë edhe kom reflektu mbi procesin, kom ardhë në përfundim që materiali bie në kundërshtim me parimin fundamental tem profesional – transparenca absolute,” shkruan ai. Ai shton se për momentin projekti nuk do të lançohet ashtu siç ishte paralajmëruar, megjithatë nuk e përjashton mundësinë që në të ardhmen të publikohet ndonjë pjesë e shkurtër nga materiali, mirëpo shanset për këtë janë shumë të vogla.
I kontaktuar nga Prive By Liberta Spahiu, Burimi është shprehur se nuk ka asgjë për të shtuar më tepër përveç atyre që ka deklaruar në postimin zyrtar:
“I kam thënë të gjitha në reagim dhe s’ka çka të shtoj më shumë.”
Ndërkohë, fansat në rrjete sociale kanë spekuluar se mund të ketë pasur pakënaqësi, apo kërkesa për ndërhyrje në montazh nga Geasy, diçka që vetë Burimi e nënkupton përmes vendimit të tij për të ruajtur integritetin profesional.
Për momentin, misteri mbetet i hapur, ndërsa publiku mbetet në pritje nëse ndonjë fragment do të bëhet publik në të ardhmen. /Prive By Liberta Spahiu
