Dramat nuk po i ndahen Chris Brown!
Këngëtari amerikan është arrestuar në orët e para të mëngjesit të sotëm në një hotel luksoz në Manchester, në lidhje me një incident të rëndë që tronditi skenën muzikore rreth dy vite më parë.
Fjala është për një ngjarje të ndodhur më 19 shkurt 2023, ku Chris dyshohet se ka përdorur një shishe tequile si armë në një klub nate në Londër.
Sipas raportimeve të fundit nga The Independent, gjithçka ka ndodhur në klubin ekskluziv Tape London, një vend i frekuentuar nga VIP-at, ku Brown ishte i pranishëm me një grup shoqëror. Producenti muzikor Abe Diaw ka deklaruar se këngëtari e ka sulmuar pa paralajmërim, duke e goditur me një shishe direkt në kokë dhe duke vazhduar më pas me shkelma edhe pasi ai ra në tokë.
Incidenti, që nuk u bë publik menjëherë, ka rezultuar në dëmtime serioze për Diaw, i cili më pas ka ngritur padi civile kundër Brown duke kërkuar plot 16 milionë dollarë dëmshpërblim. Sipas padisë, Diaw ka pësuar lëndime në fytyrë, çarje të kafkës dhe trauma afatgjata, për të cilat është dashur ndërhyrje spitalore e specializuar.
Arrestimi i Chris Brown është kryer nga Policia Metropolitane e Londrës, në një hotel në Manchester, pak pas orës 02:00 të mëngjesit të 15 majit. Aktualisht, këngëtari ndodhet në paraburgim dhe do të merret në pyetje nga njësia hetimore për sulme të rënda fizike.
Kjo goditje ligjore vjen në një kohë jo të mirë për Brown, i cili ishte në prag të një turneu të madh në Mbretërinë e Bashkuar, me një koncert të parashikuar për muajin qershor në arenën Co-op Live në Manchester. Nuk është ende e qartë nëse ky turne do të shtyhet apo anulohet për shkak të hetimeve në vazhdim.
Përfaqësuesit e Chris Brown ende nuk kanë komentuar mbi arrestimin, ndërsa rrjetet sociale tashmë janë vërshuar nga reagimet e ndjekësve që ndahen mes mbështetjes së verbër për artistin dhe kritikave të ashpra për historinë e tij të dhunës.
Kujtojmë që ky nuk është rasti i parë ku emri i Chris Brown lidhet me dhunë. Sulmi ndaj Rihannës në vitin 2009 vazhdon të jetë një njollë që nuk i largohet dot imazhit të tij, pavarësisht përpjekjeve për rehabilitim dhe rikthim në karrierë. /Prive By Liberta Spahiu
