Gjykata Themelore në Prishtinë ka miratuar kërkesën e mbrojtjes që Naim Murseli, i akuzuar për vrasjen e bashkëshortes së tij Liridona Ademaj, t’i nënshtrohet një ekzaminimi psikiatrik.
Kërkesa është parashtruar pas deklarimeve të Murselit për një gjendje emocionale të paqëndrueshme, si dhe për mendime vetëvrasëse gjatë qëndrimit në paraburgim.
Sipas vendimit të gjykatës, ekzaminimi duhet të realizohet brenda dy javësh, me qëllim që të vlerësohet gjendja mendore e të akuzuarit dhe të përcaktohet nëse ai është në gjendje të përballojë procesin gjyqësor.
Ndërkohë, në seancën e sotme gjyqësore, Naim Murseli është deklaruar i pafajshëm, duke thënë publikisht se nëse vërtetohet akuza për të cilën dyshohet, ai kërkon burgim të përjetshëm për veten.
Rasti ka tronditur opinionin publik për shkak të natyrës së rëndë të krimit dhe zhvillimeve dramatike që kanë pasuar arrestimin e tij. /Paparaci
