Sot feston ditëlindjen e 48-të një ndër figurat më të spikatura të jetës publike shqiptare – Grida Duma.
E njohur fillimisht si politikane, Grida shfaqi për vite me radhë një profil të veçantë në politikën shqiptare, ku spikati për artikulimin e saj të qartë, qëndrimet e forta dhe aftësinë për të mbrojtur me kurajo e dinjitet bindjet e saj. Për më shumë se një dekadë, ajo ishte ndër zërat më të fortë në opozitë, duke shërbyer si deputete e Partisë Demokratike dhe një prej figurave femërore më aktive në debatet publike.
Në vitin 2022, Duma mori një kthesë të guximshme në karrierën e saj, duke u larguar nga politika aktive për t’iu përkushtuar gazetarisë dhe botës së mediave. Sot, ajo është imazh i emisionit “Top Story” në Top Channel – programi që ka fituar vëmendjen e publikut për trajtimin e temave të thella që përfshijnë politikën, krimin, ekonominë dhe problematikat sociale.
Nën drejtimin e saj, “Top Story” ka arritur të rikthehet në vëmendje si një prej formateve më të forta në ekranin shqiptar, duke treguar se Grida Duma mbetet një figurë me ndikim, pavarësisht pozicionit që mban.
Nga foltorja në Kuvend, te studioja televizive, Grida ka dëshmuar se eleganca, mendimi kritik dhe forca e karakterit mund të ecin krah për krah.
Urime ditëlindjen Grida! Të urojmë shëndet, sukses dhe vazhdimësi në çdo hap që ndjek.
/Prive By Liberta Spahiu
