Një histori prekëse dashurie dhe dhimbjeje është kthyer në një makth. Arjun Patolia, një baba i dy vajzave, rezulton të jetë një ndër viktimat e aksidentit ajror tragjik të Air India, që mori jetën e 241 prej 242 pasagjerëve në bord.
Avioni, që u nis nga aeroporti i Ahmedabad në Indinë perëndimore, ra në tokë vetëm pak minuta pas ngritjes, duke u përfshirë nga flakët. Fluturimi AI171 u nis në orën 13:39 me kohën lokale, por rrugëtimi i tij për në Londër përfundoi tragjikisht.
Arjun ndodhej në Indi për të përmbushur dëshirën e fundit të bashkëshortes së tij, Bharatiben, e cila kishte ndërruar jetë vetëm shtatë ditë më parë në Londër. Ajo kishte kërkuar që hiri i saj të shpërndahej në një lumë në vendlindje, gjë që Arjun e realizoi. Por rrugës për t’u kthyer në Londër, ai rezultoi në listën e viktimave të fluturimit fatkeq që pritej të ulej në aeroportin Gatwick.
Mediat lokale raportojnë se Arjun la pas dy vajza të mitura, tetë dhe katër vjeç, të cilat jetojnë në Londër, ndërsa në Indi jeton nëna e tij, në qytetin Surat.
Ndër viktimat e tjera ishin edhe një vajzë katërvjeçare dhe një djalë dyvjeçar, të cilët ndodheshin mes 52 shtetasve britanikë që humbën jetën. Po ashtu humbi jetën edhe një familje e tërë: Akeel Nanawaba, 36 vjeç, bashkëshortja e tij Hannaa Vorajee, 30 vjeçe, dhe vajza e tyre Sara, 4 vjeçe, që po ktheheshin nga një festë familjare pesëditore.
Në bord ndodhej edhe çifti Fiongal dhe Jamie Greenlaw-Meek, themelues të një qendre spirituale mirëqenieje. Në një video që tashmë tingëllon ndryshe, ata shfaqeshin duke thënë:
“Jemi në aeroport, sapo hipëm në avion. Mirupafshim Indi. Po kthehemi të lumtur, të qetë, shumë të qetë.”
Personi i vetëm që mbijetoi nga kjo katastrofë ajrore është një burrë britanik me emrin Vishwash Kumar Ramesh. Pamjet dramatike treguan 40-vjeçarin duke dalë nga rrënojat e avionit.
/Prive By Liberta Spahiu
