Një nga momentet më të forta emocionale të këtij sezoni të “She’s On Top” ka ardhur nga 22-vjeçarja Marigona Haliilaj.
Modelja nga Gjilani ka tronditur publikun me rrëfimin e saj të dhimbshëm, teksa foli për një ngjarje tragjike që i ka përcaktuar jetën që në fëmijëri: vrasjen e të atit nga nëna e saj, në rrethana të mbushura me dhunë dhe rrezik për jetën e fëmijëve.
“Jetoj me mamin në Gjilan. Ajo ka bërë shumë sakrifica për ne. Babi im ka ushtruar dhunë ekstreme ndaj saj dhe familjes. Në vitin 2005, kur isha vetëm 2 vjeçe e gjysmë, ndodhi tragjedia. Mami e vrau babin për të na shpëtuar. Ai kishte një thikë në dorë dhe po përpiqej të vriste vëllain tim”, tregoi Marigona mes lotësh.
Sipas saj, nëna kishte bërë përpjekje të shumta për ta denoncuar në polici dhe për t’u ndarë nga ai, por institucionet nuk kishin reaguar në kohë. Situata, siç e përshkruan Marigona, kishte degraduar deri në një akt fatal të vetëmbrojtjes për të shpëtuar jetën e fëmijëve.
“Mami është vetëdorëzuar në polici. Shteti na mori nën kujdestari, por gratë e tjera dhe fëmijët që babi kishte nga martesat e kaluara dërguan letra në gjykatë për ta liruar mamin”, tregoi më tej ajo.
Pavarësisht kësaj tragjedie, Marigona është rritur me mbështetjen dhe forcën e nënës së saj. Ajo shprehet se pjesëmarrja në program është një ëndërr e realizuar për të dhe një burim krenarie për të ëmën.
“Mami më përkrah shumë. E kam marrë me vete që në edicionet e para. E di që ajo beson në mua”, përfundoi ajo rrëfimin, duke lënë pa fjalë publikun.
Një histori që dëshmon se pas çdo buzëqeshjeje mund të fshihet një betejë e madhe. Dhe Marigona është një prej atyre që ka zgjedhur të ecë përpara me forcë dhe dinjitet. /Prive By Liberta Spahiu
