Pas publikimit të lajmeve të fundit për Feron, i cili është akuzuar nga Prokuroria Themelore në Gjilan për tri vepra penale: dhunë në familje, ngacmim seksual dhe kanosje, ka reaguar edhe avokatja e tij mbrojtëse.
Sipas njoftimit të bërë nga përfaqësuesja ligjore e artistit, seanca e datës 25 qershor 2025 ishte zhvilluar me dyer të mbyllura, dhe çdo publikim i materialeve apo të dhënave nga ajo seancë përbën një shkelje të rëndë të ligjit dhe të parimeve të një procesi të drejtë gjyqësor.
Ajo theksoi se aktakuza ende nuk ka marrë formë të prerë, pasi nuk është konfirmuar nga gjykata, dhe publikimi i saj në këtë fazë është i papranueshëm. Avokatja e konsideron këtë si një përpjekje për manipulim të opinionit publik dhe devijim nga e vërteta, duke shtuar se pala tjetër në këtë proces është po ashtu objekt i ndjekjes penale për çështje të tjera, me aktakuza të ngritura nga e njëjta prokurori.
Në deklaratën e saj, avokatja nënvizon se klienti i saj është i përkushtuar në një betejë jo vetëm ligjore, por edhe personale për të drejtën e kontaktit me vajzën e tij, duke e cilësuar këtë si një luftë për një lidhje të shenjtë mes prindit dhe fëmijës.
“Zëri i tij nuk do të heshtë. Kujtimi i tij nuk do të fshihet. Ai do të vazhdojë të kërkojë të bijën derisa ajo derë të hapet, derisa ai përqafim të ndodhë,” thuhet në reagimin e fuqishëm të mbrojtjes.
Sipas saj, drejtësia ka ende zë dhe zemër në këtë vend, dhe fakti do të mbizotërojë mbi zhurmën në sallën e gjyqit. /Prive By Liberta Spahiu
View this post on Instagram
