Andy Byron u bë viral javën e kaluar, pasi ish-drejtuesi i firmës së infrastrukturës së të dhënave Astronomer u kap në ekranin gjigant të stadiumit me duart e mbështjella rreth drejtoreshës së burimeve njerëzore të kompanisë, Kristin Cabot, ndërsa të dy lëkundeshin me muzikën gjatë një koncerti në Massachusetts, të mërkurën (16 korrik).
Kur kamera kaloi te të dy, këngëtari 48-vjeçar mund të dëgjohej duke thënë: “Oh, shikoni këta të dy,” – por sapo e kuptuan se ishin në ekranin e madh, Byron u largua menjëherë nga pamja, ndërsa Cabot i ktheu shpinën skenës.
Reagimi i tyre erdhi për shkak se Byron është i martuar me Megan Kerrigan – e cila raportohet se ka hequr mbiemrin e Byron nga llogaritë e saj në rrjetet sociale – dhe kanë dy fëmijë së bashku.
Chris Martin, i hutuar, më pas tha: “Oh, çfarë? Ose kanë një lidhje sekrete ose janë thjesht shumë të turpshëm… Nuk jam i sigurt çfarë të bëj.”
Tani, në performancën e parë që nga incidenti, Martin u pa duke bërë shaka për skandalin, në një video të regjistruar nga fansat.
“Do të donim t’ju përshëndesnim disa prej jush në turmë,” tha këngëtari për fansat në stadiumin Camp Randall, në Madison, Wisconsin, të shtunën.
“Mënyra si do ta bëjmë këtë është përmes kamerave tona dhe do të vendosim disa prej jush në ekranin e madh.”
Ai më pas shihet duke buzëqeshur për vete, ndërsa dëgjohet e qeshura e turmës, para se të bëjë shaka: “Prandaj, nëse nuk e keni bërë grimën, bëjeni tani.”
Llogaria që postoi videon, @weeklycoldplay, më vonë shtoi: “GJITHASHTU ASNJË ÇIFT NUK U SHFAQ NË EKRANIN GJIGANT LOL.”
Dhe ndoshta kjo ishte për të mirën.
Byron që atëherë ka dhënë dorëheqjen nga posti i tij në Astronomer, pasi kompania publikoi një deklaratë të premten ku zbuloi se kishte hapur një hetim zyrtar.
Duke konfirmuar se Byron nuk do të përfaqësonte më kompaninë, një deklaratë nga Astronomer thoshte:
“Siç është deklaruar më parë, Astronomer është e përkushtuar ndaj vlerave dhe kulturës që na kanë udhëhequr që nga themelimi. Udhëheqësit tanë pritet të jenë shembull në sjellje dhe përgjegjësi, dhe së fundmi, ky standard nuk është përmbushur. Andy Byron ka dorëzuar dorëheqjen, dhe Bordi i Drejtorëve e ka pranuar atë. Bordi do të fillojë kërkimin për CEO-n e ardhshëm, ndërsa bashkëthemeluesi dhe drejtori i produkteve, Pete DeJoy, vazhdon të shërbejë si CEO i përkohshëm.”
Deklarata vazhdoi: “Para kësaj jave, ishim të njohur si pionierë në hapësirën e DataOps, duke ndihmuar ekipet e të dhënave me gjithçka nga analiza moderne deri te inteligjenca artificiale në prodhim.”
“Edhe pse njohja për kompaninë tonë mund të ketë ndryshuar brenda natës, produkti dhe puna jonë për klientët nuk kanë ndryshuar.”
“Ne po vazhdojmë të bëjmë atë që dimë të bëjmë më mirë: t’i ndihmojmë klientët tanë me problemet më të vështira të të dhënave dhe inteligjencës artificiale.” /Prive By Liberta Spahiu
