Për tre netë me radhë, Mitrovica kthehet në kryeqendrën e muzikës jazz me rikthimin e festivalit Mitrovica International Jazz Days, që mbahet nga 8 deri më 10 gusht 2025, në City Park.
Nën organizimin artistik të këngëtares së njohur Rona Nishliu, festivali këtë vit sjell një përzgjedhje të jashtëzakonshme artistësh nga e gjithë bota, duke e kthyer qytetin në një skenë të hapur të bashkimit përmes tingujve.
Pjesë e programit do të jenë emra të shquar ndërkombëtarë si:
Emma Smith nga Mbretëria e Bashkuar – fituese e çmimit “UK Parliamentary Jazz Award” dhe vokaliste e njohur e Postmodern Jukebox;
Eiko Suzuki & Rina Kohmoto nga Japonia me projektin e tyre kinematik “EYRIE”, të shoqëruara nga Kan Yanabe;
Hakan Başar Trio nga Turqia – një nga talentet më të ndritura të xhazit të ri;
Mike del Ferro nga Holanda – pianist që ka performuar në mbi 117 shtete, me një stil që përzien jazz-in me ritme botërore.
E veçanta e këtij edicioni? Për herë të parë, festivali sjell një përplasje unike mes jazz-it dhe hip-hop-it: MC Kresha & Lyrical Son ngjiten në skenë të shoqëruar nga MIJD Big Band nën dirigjimin e mjeshtrit Edon Ramadani, për një natë që pritet të jetë unike.
Në mbyllje të festivalit, më 10 gusht, publiku do të ketë rastin të përjetojë performancën e ndjerë “INTROSPECTIVE” nga Ilir Bajri, një prej figurave më frymëzuese të xhazit në Kosovë, i shoqëruar nga Visar Kuçi dhe Enes Beu.
Hyrja është falas dhe e hapur për të gjithë. Një festë ndërkulturore, një bashkim përmes muzikës, një arsye më shumë për ta vizituar Mitrovicën këtë verë!
/Prive By Liberta Spahiu
