Dikur simbol i luksit dhe i famës virale, Nusret Gökçe – i njohur si Salt Bae – është sot shembulli më i mirë se si një perandori mund të shembet kur mbështetet vetëm në imazh dhe jo në substancë.
I famshëm për lëvizjen ikonike të kriposjes dhe për fotot me yje si Messi, DiCaprio dhe Beckham, Salt Bae ndërtoi një rrjet restorantesh luksoze nën emrin “Nusr-Et”, ku biftekët mbështilleshin me fletë ari dhe faturat arrinin në mijëra euro. Por sot, shkëlqimi ka nisur të zbehet me shpejtësi.
Vetëm në SHBA, nga 7 restorante që operonte në vitin 2023, aktualisht kanë mbetur vetëm 2 – në Miami dhe New York. Të tjerat, përfshirë ato në Beverly Hills, Boston, Dallas dhe Las Vegas, janë mbyllur njëra pas tjetrës për shkak të mungesës së klientëve, kritikave për cilësinë dhe çmimeve absurde. Njësoj edhe globalisht: nga mbi 30 restorante në kulmin e suksesit, tani raportohen rreth 25 që mbeten aktive.
Por më i rëndë se mbyllja e lokaleve është imazhi që po rrënohet. Mediat ndërkombëtare kanë zbuluar se brenda restoranteve të tij është zhvilluar një kulturë toksiqe pune. Ish-punonjës e kanë akuzuar për shkelje të të drejtave të punës, detyrim për të punuar mbi 90 orë në javë pa pagesë shtesë, manipulim me bakshishet dhe sjellje diskriminuese ndaj grave. Një padi në New York u mbyll me një marrëveshje prej 230 mijë dollarësh, ndërsa raportimet e tjera për trajtim çnjerëzor kanë ardhur nga Londra, Mykonos e Dubai.
Përveç kësaj, sjellja e tij në publik ka lënë një shije të hidhur. Ndërhyrja e papërshtatshme në fushën e finales së Botërorit 2022 për të bërë foto me trofeun dhe Lionel Messin ndezi kritika të ashpra. Ai nuk shihej më si një personazh karizmatik, por si një figurë që kishte kaluar kufijtë e vetvetes.
Sot, Salt Bae nuk është më as simbol elegance, as shef ushqimi i përjetshëm. Ai është një kujtesë e gjallë se viralet zgjasin pak, dhe pa përkushtim të vërtetë ndaj cilësisë dhe njerëzve që punojnë pas kuintave, çdo sukses është i përkohshëm.
Një përandori e ngritur mbi kripë… që po shkrihet ngadalë.
/Prive By Liberta Spahiu.
