Aktori dhe producenti i njohur Arianit Hoti, i cili njihet për krijimin e serialit shumë të suksesshëm “Shtëpia e Madhe”, ka vendosur të angazhohet në një kapitull të ri të jetës së tij – politikën.
Përmes një postimi në rrjetet sociale, Hoti bëri të ditur se do të kandidojë për Asamblenë Komunale të Drenasit, përkrah kryetarit aktual Ramiz Lladrovci.
Ai theksoi se motivi i tij nuk është një karrige politike, por dëshira për të qenë “zëri i qytetarëve” dhe për të kontribuar në zhvillimin e komunës që ai e quan shtëpi.
“Në pesë vite pune kam realizuar mbi 300 episode televizive, duke u përpjekur të kuptoj emocionet dhe sfidat e njerëzve. Kjo përvojë më ka mësuar t’i dëgjoj dhe t’i përfaqësoj ata,” u shpreh Hoti.
Ai gjithashtu vlerësoi lart punën e kryetarit Lladrovci, duke e cilësuar si model të udhëheqjes me vizion dhe përkushtim.
Me këtë hap, Arianit Hoti synon të sjellë në politikë një frymë të re, të mbështetur në përvojën e tij me njerëzit dhe pasionin për të ndikuar pozitivisht në komunitet.
Suksese në këtë rrugëtim të ri! /Prive By Liberta Spahiu
