Një nga grupet më legjendare të hip-hop-it shqiptar, Babastars, rikthehet më 13 gusht në një mbrëmje që pritet të shënojë një moment historik për fansat.
Në kuadër të 15-vjetorit të Zone Club, skena do të mirëpresë një ribashkim të rrallë të anëtarëve që dikur dominuan tregun muzikor dhe sollën një epokë të re për rap-in shqiptar.
Në listën e performuesve janë konfirmuar Ghetto Geasy, Skivi, Majk, Onat dhe Cozman – një kombinim që rikthen atmosferën e viteve të arta të label-it.
Por me gjasë mungesa që pritet është ajo e Agon Amigës. Burime pranë tyre thonë se ai ende nuk i ka tejkaluar hatërmbetjet me Ghetto Geasy-n, çka ka bërë që të mos jetë pjesë as e albumit të fundit të Getit, publikuar në maj, dhe as e këtij ribashkimi.
Kjo dalje në skenë do të jetë e para e përbashkët e Babastars pas shumë kohësh, duke mos llogaritur eventin e mbyllur për promovimin e albumit të Getit disa javë më parë.
Me një repertor të pasur me hite që kanë mbetur në memorien e publikut dhe me energjinë unike që i ka karakterizuar, mbrëmja e së mërkurës pritet të jetë një rikthim nostalgjik që do flasë gjatë. /Prive By Liberta Spahiu
