Kinematografia spanjolle është në zi pas ndarjes nga jeta të aktores së njohur Verónica Echegui, e cila ka ndërruar jetë në Madrid, në moshën 42-vjeçare.
Echegui, e cila ka luajtur në mbi 30 filma, u bë e njohur me rolin në filmin Yo Soy La Juani në vitin 2006, për të cilin u nominua për çmimin prestigjioz Goya për Aktoren më të Mirë. Ajo më pas interpretoi në filma të tillë si My Prisoner’s Yard (2008) dhe The Cold Light of Day përkrah Sigourney Weaver dhe Bruce Willis. Në vitin 2022 fitoi çmimin Goya për filmin e shkurtër Tótem Loba.
Aktorja ishte dërguar me urgjencë në spital të dielën, ndërsa sipas revistës ¡Hola!, ajo kishte luftuar fshehurazi me kancerin, gjë që e dinin vetëm disa njerëz brenda industrisë.
Homazhet për të nuk munguan. Kryeministri i Spanjës, Pedro Sánchez, u shpreh:
“Jam thellësisht i tronditur nga lajmi për ndarjen nga jeta të Verónica Echegui, një aktore me talent të jashtëzakonshëm dhe përulësi të madhe, që na la shumë herët. Ngushëllimet e mia më të sinqerta për familjen dhe miqtë.”
Edhe aktori Antonio Banderas reagoi me dhimbje:
“Sot, kinemaja spanjolle është në zi për humbjen e Verónica Echegui. Ngushëllimet e mia për familjen dhe miqtë e saj.”
Karriera e saj prej 18 vitesh përfshiu role të shumta, mes tyre në serialin Fortitude (2015–2017), si dhe në komedinë romantike Book of Love. Roli i saj i fundit ishte në serialin e Apple TV, Love You To Death.
Përtej ekranit, Echegui njihej si një aktiviste e zëshme kundër abuzimeve seksuale në industrinë e argëtimit, duke rrëfyer se edhe vetë kishte qenë viktimë disa herë gjatë punës së saj. /Prive By Liberta Spahiu
