Prej kohësh, Ozempic ishte ilaçi më i përfolur për humbje peshe dhe trajtimin e diabetit tip 2. Por tani, në skenë ka hyrë një rival edhe më i fuqishëm: Mounjaro, që sipas studimeve të fundit po arrin rezultate dukshëm më të mëdha.
Në dallim nga Ozempic, që vepron vetëm si agonist i receptorit GLP-1, Mounjaro kombinon dy mekanizma – GLP-1 dhe GIP – duke dhënë efekte të dyfishta. Rezultati? Përdoruesit e Mounjaro-s kanë humbur deri në 20 për qind të peshës trupore brenda një viti, më shumë se çdo ilaç tjetër i kësaj kategorie.
Mjekët theksojnë se përveç peshës, Mounjaro ofron edhe kontroll më të mirë të niveleve të sheqerit në gjak, duke e bërë një armë të fortë kundër diabetit tip 2. Megjithatë, efektet anësore gastrointestinale – si nauze dhe shqetësime të stomakut – mbeten të pranishme, shpesh më të theksuara në fillim të trajtimit.
Në SHBA dhe Europë, ilaçi po fitohet gjithnjë e më shumë terren dhe duket se po e zëvendëson ngadalë Ozempic. Por në Kosovë, asnjëri nga këto barna nuk është ende i qasshëm zyrtarisht për humbje peshe – përdorimi i tyre mbetet i kufizuar tek pacientët me diabet dhe kryhet vetëm përmes recetave të importuara ose përmes porosive jashtë vendit.
Ekspertët paralajmërojnë se, pavarësisht efektit magjik në shifra, këto barna nuk janë “ilaç mrekullie” dhe duhet të merren vetëm nën kujdesin e mjekut. Studimet afatgjata për sigurinë e tyre janë ende duke u zhvilluar, ndërsa kompanitë farmaceutike tashmë po përgatisin gjeneratën e re të barnave që pritet të jenë edhe më të fuqishme.
/Prive By Liberta Spahiu
