Autoritetet në Utah kanë arrestuar 22-vjeçarin Tyler Robinson, i dyshuar si autor i vrasjes së aktivistit konservator amerikan, Charlie Kirk.
Lajmi është konfirmuar nga Presidenti i SHBA-së, Donald Trump, i cili për Fax News deklaroi se Robinson ndodhet në paraburgim dhe shtoi se shpreson që ai të dënohet me vdekje. Sipas Trump, pikërisht babai i autorit ishte ai që e dorëzoi tek autoritetet.
“Shpresoj që t’i japin dënimin me vdekje”, tha Trump.
Pamjet e publikuara nga kamerat e sigurisë tregojnë autorin e dyshuar teksa zbret nga një çati dhe largohet me vrap nga Universiteti i Luginës së Utah-it, aty ku Kirk po mbante një fjalim.
Hetuesit janë përqendruar tek arma e gjetur në një zonë pyjore, gjurmët e këpucës dhe të duarve, si dhe imazhet e arratisjes.
Sipas të dhënave, Robinson kishte mbërritur në kampus pak para mesditës, ishte ngjitur në çatinë e Qendrës Losee dhe kishte qëlluar me një pushkë precize nga një distancë prej 180 metrash, duke e goditur Kirk në qafë.
Ngjarja ndodhi ndërsa 31-vjeçari, baba i dy fëmijëve dhe themelues i “Turning Point USA”, po diskutonte me studentët për fenomenin e vrasjeve në SHBA.
Hetimet kanë zbuluar gjithashtu se i riu ia kishte rrëfyer krimin një miku përmes mesazheve, ndërsa mbi plumbat kishte shkruar fraza provokuese si “Bella Ciao”, “Hej fashist, merre këtë” dhe “Nëse e lexon këtë, je gay LMAO”. Po ashtu, Robinson kishte komunikuar në platformën Discord për armën dhe veprimet e tij.
Guvernatori i Utah-ut, Spencer Cox, e cilësoi ngjarjen një sulm ndaj të gjithëve dhe falënderoi familjen e autorit për bashkëpunimin me autoritetet.
