Vetëm katër ditë para përvjetorit të 29-të të martesës, bashkëshortja e Akon ka dorëzuar kërkesën për divorc.
Sipas dokumenteve të siguruara nga People, Tomeka Thiam ka bërë kërkesën zyrtare më 11 shtator, duke përmendur “mosmarrëveshje të pajtueshme” si arsye të ndarjes. Në dokumente ajo ka theksuar se çifti kanë një vajzë të përbashkët, Journey, 17 vjeç.
Thiam ka kërkuar kujdestari ligjore të përbashkët për vajzën, ndërsa kujdestarinë fizike ta mbajë ajo, me të drejtë vizitash për këngëtarin 52-vjeçar. Përveç kësaj, ajo ka kërkuar mbështetje financiare për vete, ndërsa gjykata të mos i japë ndonjë përfitim të tillë Akon-it.
Akon ndër vite ka qenë i hapur për bindjet e tij mbi poligaminë, duke pranuar se ka nëntë fëmijë dhe disa bashkëshorte. Në një intervistë të vitit 2022, ai tha se kjo është pjesë e kulturës së tij afrikane.
“[Poligamia] është pjesë e kulturës sonë. Ne nuk e kemi parë si diçka jashtë normales. Problemi i botës perëndimore është që krijoi rregulla pa marrë parasysh natyrën,” tha artisti i hiteve si Smack That dhe Don’t Matter.
Akon ka theksuar se për të, detyra kryesore është të sigurojë mirëqenien e familjes:
“Unë jam aty për të gjithë fëmijët e mi. Puna ime është t’i rris me përgjegjësi, t’i mbroj nënat e tyre dhe të kujdesem që të kenë gjithçka që u duhet,” ka thënë ai, duke shtuar se komunikimi përmes telefonit e mban çdo ditë pranë tyre.
Në vitin 2023, këngëtarja Amirror deklaroi se ishte një nga katër bashkëshortet e Akon. Ajo tha se gratë e tij jetojnë në qytete të ndryshme, mes tyre në Atlanta, Los Angeles dhe Afrikë.
“Ne kemi shtëpi të ndryshme, mënyra jetese të ndryshme dhe nuk kemi pse ta shohim apo të shoqërohemi me njëra-tjetrën. Kjo është kultura jonë, dhe çdo grua dëshiron të jetë e vetmja, por është në rregull,” tha Amirror.
Ky divorc pritet të sjellë zhvillime të reja në jetën personale të yllit botëror, i cili prej vitesh ka qenë në qendër të vëmendjes për jetën e tij familjare jo tradicionale. /Prive By Liberta Spahiu
