Përplasjet politike brenda botës së muzikës kanë shkaktuar një tjetër tronditje.
Këngëtarja me famë botërore Dua Lipa ka vendosur të ndërpresë bashkëpunimin me agjentin e saj David Levy, pas një letre që ai kishte firmosur kundër grupit irlandez Kneecap, të njohur për qëndrimet e tyre pro-Palestinë.
David Levy, i njohur si një nga figurat e rëndësishme të agjencisë së madhe WME, ishte mes personave që kishin nënshkruar një letër drejtuar organizatorëve të festivalit të Glastonbury, Michael dhe Emily Eavis. Në letër kërkohej që grupi Kneecap të mos lejohej të ngjitej në skenë, për shkak të aktivizmit të tyre politik pro-Palestinë.
Megjithatë, letra nuk pati efektin e pritur. Kneecap performoi në festival, ndonëse BBC nuk e transmetoi drejtpërdrejt performancën e tyre, çka u pa si një formë presioni të heshtur.
Sipas mediave britanike, Dua Lipa e pa këtë veprim të agjentit të saj si një mbështetje ndaj luftës së Izraelit në Gaza dhe një qëndrim kundër të drejtave të palestinezëve. Ky ishte momenti kur artistja kosovaro-britanike vendosi të shkëpuste çdo lidhje pune me David Levy.
“Për mua ishte e qartë se ky nuk ishte thjesht një qëndrim profesional, por një akt i drejtpërdrejtë politik kundër një kauze që unë e mbështes publikisht,” është cituar një burim pranë këngëtares.
Dua Lipa ka qenë prej kohësh e zëshme në mbrojtje të të drejtave të palestinezëve. Vitin e kaluar ajo bëri thirrje për armëpushim humanitar në Gaza dhe ka kritikuar vazhdimisht dhunën ndaj civilëve. Ky angazhim publik e ka pozicionuar atë si një nga artistet më me ndikim që lidhen hapur me çështjen palestineze.
Ndërsa Dua Lipa ka ruajtur marrëdhënien me agjencinë WME, shkarkimi i Levy-t shihet si një mesazh i qartë për industrinë: artistët nuk do të tolerojnë përfaqësues që veprojnë kundër kauzave që ata përkrahin. /Prive By Liberta Spahiu
