Në New York, komuniteti shqiptar ka përjetuar një moment të veçantë gjatë një aktiviteti kulturor ku mori pjesë edhe kongresistja e njohur amerikane, Alexandria Ocasio-Cortez (e njohur si AOC).
Në platformën ‘X’ është postuar një video ku shihet AOC duke vallëzuar së bashku me fëmijë të veshur me kostume tradicionale shqiptare, duke u bërë pjesë e një valleje tipike shqiptare.
Pamjet, të shpërndara në rrjete sociale, kanë marrë vëmendjen e publikut dhe janë pritur me shumë entuziazëm nga shqiptarët e Amerikës dhe më gjerë. Në video shihet Ocasio-Cortez, e thjeshtë dhe e buzëqeshur, duke i ndjekur hapat e fëmijëve shqiptarë, teksa flamuri i Shqipërisë dhe ai amerikan valëviten krah për krah në sfond.
Ky gjest simbolik është përjetuar si një shenjë respekti për kulturën shqiptare dhe për kontributin e diasporës në SHBA. Për komunitetin shqiptar në New York, prezenca e një figure të tillë të rëndësishme politike është një vlerësim i veçantë dhe një urë që lidh traditën shqiptare me realitetin amerikan.
Në rrjetet sociale, shumë shqiptarë kanë falënderuar AOC për përfshirjen e saj dhe për mënyrën si e ka nderuar kulturën e tyre. Shumë komente e përshkruan videon si një moment krenarie për diasporën, ku fëmijët, përmes valleve dhe veshjeve tradicionale, i rikujtuan Amerikës se trashëgimia shqiptare vazhdon të ruhet e gjallë edhe për brezat e rinj.
Kjo ngjarje tregon edhe njëherë rolin e fortë që shqiptarët kanë në jetën shoqërore dhe kulturore në SHBA, si dhe lidhjen e tyre të ngushtë me traditat, pavarësisht largësisë nga atdheu. /Prive By Liberta Spahiu
🇺🇸🇦🇱 US Representative AOC posted a video dancing Albanian valle with children in New York. pic.twitter.com/RGUjPUGSwP
— kos_data (@kos_data) September 28, 2025
