Joshua Allen, fituesi i edicionit të vitit 2008 të “So You Think You Can Dance”, ka ndërruar jetë në moshën 36-vjeçare, ka konfirmuar familja e tij.
Allen u bë i njohur në sezonin e katërt të spektaklit të vallëzimit në moshën vetëm 18-vjeçare.
Më pas ai u shfaq në filma dhe seriale televizive, përfshirë “Step Up 3D”, së bashku me finalistët e tjerë të SYTYCD, Katee Shean dhe Stephen ‘tWitch’ Boss. Ai gjithashtu u shfaq në “Footloose” (2011), American Horror Story, Community, si dhe në reklama për marka si Honda, McDonald’s dhe US Census.
Një anëtar i familjes i tha TMZ se Allen u godit nga një tren dhe ndërroi jetë në spital pranë shtëpisë së tij në Teksas, të martën (30 shtator).
Departamenti i Policisë në Fort Worth konfirmoi për median se kishte marrë një telefonatë atë ditë për një person që ishte goditur nga një tren. Hetimet për rastin vazhdojnë.
Anëtari i familjes i kërkoi publikut “privatësi dhe lutje”, duke e kujtuar Allen si “një njeri me integritet dhe dikë që gjithmonë kërkonte të bashkonte familjen”.
Pas vdekjes së Allen, fansat kanë rikthyer vëmendjen te rrjetet e tij sociale, ku kanë zbuluar se postimi i tij i fundit ishte një homazh për aktorin e The Cosby Show, Malcolm-Jamal Warner, i cili kishte ndërruar jetë më herët atë muaj gjatë pushimeve me familjen në Kosta Rika.
Në korrik, Allen kishte ndarë një foto me të, me mbishkrimin: “Fluturo lart Mbret #shkuarshpejt.”
Ndërkohë, koreografi dhe miku i tij, Emmanuel Hurd, publikoi një dedikim prekës në Instagram për Allen:
“Nuk mund ta besoj këtë… Josh… vëllai im. Nuk ka fjalë. Ti ishe jeta e festës,” shkroi ai.
“Ti ishe Batman. Kampion. Një nga njerëzit më të sinqertë që kam njohur ndonjëherë. E tregoje gjithmonë të vërtetën dhe përpiqeshe të ndreqje çdo gjë nëse gaboje. Një Mbret i vërtetë.”
Ai e përfundoi postimin duke thënë:
“Kjo dhemb shumë. E di që tani je me Stephen-in dhe kjo më jep pak ngushëllim. Të dua vëlla.”
Ai iu referua Stephen ‘tWitch’ Boss, finalisti i SYTYCD, i cili ndërroi jetë në dhjetor 2022 në moshën 40-vjeçare, duke kryer vetëvrasje.
Allen kishte nisur të vallëzonte në moshën tetëvjeçare dhe e konsideronte Michael Jackson-in si një nga frymëzimet e tij të para.
Pas fitores në SYTYCD, ai tronditi publikun kur zbuloi se nuk kishte pasur asnjë trajnim teknik në fëmijëri. Por ai i tha Entertainment Weekly se kishte marrë “disa” klasa moderne dhe baleti, sepse “mendova se, për t’u bërë një valltar më i mirë, duhej të merrja lloje të ndryshme klasash dhe të zgjeroja horizontin tim në artin e vallëzimit.”
“Nuk doja të audicionoja për spektaklin pa ditur asgjë,” shtoi ai.
Në vitin 2017, Allen pranoi fajësinë pa kundërshtim për dhunë në familje dhe u dënua me një vit burg në qarkun lokal.
Sipas Los Angeles Daily News, ai gjithashtu u dënua me 5 vite prove zyrtare, 52 javë këshillim për dhunë në familje, dhe një urdhër ndalimi 10-vjeçar, që i kërkonte të qëndronte larg viktimës – ish-të dashurës së tij. /Prive By Liberta Spahiu
