Dy burra të panjohur, roli i vajzës së saj, mungesa e rëndësishme në funeral dhe mospërputhje në versionet e ngjarjes. Vdekja e këngëtares së njohur po bëhet çdo herë e më mister me hije të forta dyshimi.
Artistja turke Güllü ra nga kati i gjashtë i banesës së saj në Yalova natën e 26 shtatorit, por çdo ditë po dalin detaje që e bëjnë ngjarjen edhe më të errët.
Raporti paraprak i autopsisë nuk tregoi shenja dhune. Vajza e saj dëshmoi se Güllü ishte e dehur, po dëgjonte muzikë dhe humbi ekuilibrin. Por fqinjët tregojnë për dy burra që u panë në dhomën e saj dhe një këpucë të bardhë – jo të një gruaje, por të një burri.
Një dëshmitar në transmetim live zbuloi se në shtëpi atë natë ishte edhe i dashuri i vajzës dhe një mike e ngushtë, Sultan. Por Sultan nuk u pa kurrë në funeral dhe pas ngjarjes është zhdukur.
Kontradiktat vetëm sa shtohen: para rënies Güllü shihej me një fustan të zi, por trupi i saj u gjet në pizhame. Ajo kishte platina në bel dhe probleme shëndetësore që e bënin të pamundur t’i afrohej dritares apo të kërcente. Ndërkohë disa regjistrime audio nuk përputhen me versionet zyrtare.
Në media kanë nisur të qarkullojnë edhe teori të tjera. Disa sugjerojnë se Güllü mund të ketë parë diçka që nuk duhej, të tjerë aludojnë për motive financiare dhe çështje pasurie.
Ka madje edhe konspiracione që flasin për metoda të sofistikuara për të fshehur një vrasje.
Dosja është tashmë në duart e departamentit të vrasjeve, ndërsa kamerat e sigurisë po shqyrtohen. A ishte kjo një rënie aksidentale, një vetëvrasje, apo një vrasje e planifikuar? Hetimet vazhdojnë, por e vërteta për vdekjen e Güllü mbetet e mbuluar nga misteri. /Prive By Liberta Spahiu
