Policia e Shtetit njoftoi se Kleviol Ahmeti, 39 vjeç, i njohur si Cllevio, është ekstraduar nga Dubai në Shqipëri në kuadër të operacionit ndërkombëtar “The Wanted”, në bashkëpunim mes Interpol Tiranës dhe Interpol Abu Dhabit.
Sipas njoftimit zyrtar, ai ishte në kërkim ndërkombëtar pas vendimeve të Gjykatave të Tiranës dhe Fierit për veprat penale “Përndjekja” dhe “Largimi i të burgosurit nga vendi i qëndrimit”.
Në komunikatën zyrtare theksohet se reperi akuzohet se për një periudhë të gjatë ka përndjekur një shtetas dhe familjarët e tij, edhe përmes rrjeteve sociale.
Gjithashtu, ndaj tij ekziston një dënim i formës së prerë nga Gjykata e Fierit prej 9 muajsh burg për thyerje të masës së sigurisë. Ahmeti u ndalua në Dubai disa muaj më parë; paraprakisht dyshohet se gjatë shoqërimit është konstatuar edhe me lëndë narkotike.
Përveç këtyre, Cllevio është nën hetim për porositjen e djegies së një automjeti luksoz në pronësi të Kozak Braçit, si dhe për kallëzime të tjera të paraqitura nga figura publike, mes tyre edhe reperi Noizy.
Pas mbërritjes në Tiranë, 39-vjeçari pritet të dalë para gjykatës për t’u përballur me të gjitha akuzat që rëndojnë mbi të. Autoritetet thonë se bashkëpunimi policor ndërkombëtar do të vijojë për kapjen dhe sjelljen para drejtësisë të personave që fshihen jashtë vendit. /Prive By Liberta Spahiu
View this post on Instagram
