Dy vëllezërit me origjinë shqiptare, Arber dhe Florian Xhekaj, kanë bërë krenarë shqiptarët në mbarë botën pas paraqitjes së tyre së bashku në një ndeshje të NHL – ligës më prestigjioze të hokejit në botë.
Për herë të parë, të dy djemtë e familjes Xhekaj veshën fanellën e Montreal Canadiens në të njëjtin takim, duke shënuar një moment të rrallë dhe historik për sportin kanadez dhe për komunitetin shqiptar.
Florian, më i riu i vëllezërve, pati një debutim për t’u mbajtur mend, pasi shënoi edhe golin e tij të parë në NHL, ndërsa Arber ishte në akull për ta përkrahur dhe për ta përqafuar me emocion pas golit. Pamjet nga ndeshja janë shpërndarë me shpejtësi në rrjete sociale, duke emocionuar tifozë e shqiptarë anembanë botës.
Në tribuna ndodhej edhe nëna e tyre, Simona Xhekaj, e cila udhëtoi plot gjashtë orë për t’i surprizuar djemtë dhe për t’i parë duke luajtur krah për krah. Lotët e saj të gëzimit pas golit të Florianit janë bërë simbol i krenarisë dhe përkushtimit prindëror, duke emocionuar të gjithë ndjekësit.
Rruga drejt suksesit për vëllezërit Xhekaj nuk ka qenë e lehtë. Arber ka punuar dikur në një magazinë “Costco”, para se të realizonte ëndrrën e tij për t’u bërë sportist profesionist. Sot, bashkë me vëllain e tij Florian, ata janë shembull i qartë se me punë, disiplinë dhe besim, çdo ëndërr mund të bëhet realitet.
Për shumë shqiptarë në Kanada dhe në diasporë, Arber dhe Florian përfaqësojnë më shumë se sa dy sportistë të suksesshëm – ata janë simbol i krenarisë, përkushtimit familjar dhe guximit për të ndjekur ëndrrat. /Prive By Liberta Spahiu
View this post on Instagram
